Kum tina neih thin Republican Jewish Coalition summit-naah thu sawiin US Ambassador to the United Nations lo ni tawh leh Grand Old Party (GOP) president leh nakum-a US President chuh thei tura ngaih Nikki Haley chuan Donald Trump-an dictator tia a lo fak tawhna leh hel pawlte a lo sawi tawhnaa a fakna chu a hnial let a ni, tiin New York Post chuan a sawi. Haley chuan Prime Minister Benjamin Netanyahu-a’n October 7-a Hamas te a beih dan chungchanga Trump-a’n a fakna chu a sawisel bawk a. He inbeihnaah hian Trump chuan Netanyahu chu a inbuatsaih lo tiin a sawi a, mahse hei hi Haley hian hnial kalhin Trump-a hian kum 2020-a President Bidena thlan tlin a nih khan Netanyahu hi a lawm a rin loh thu Trump-a hian a rin vang niin Haley chuan a sawi a ni.
Sawi belh zelin Haley hian Trump-a’n Lebanese tanpui hel Hezbollah Iran thlawp ni bawk leh US-in hel pawl-a a puan ni bawk a fakna chungchang a rawn sawi fiah a. Trump-a hian Hezbollah hel pawl te chu an fel em em “Very smart” tiin hei hi a campaign-naah chuan fel tih hi tha tihna ni lo “smart does not equal good” tiin a sawi fiah leh thu a sawi bawk a ni. “President ka nihna angin Hezbollah te hi ka fak tur a ni lo a. Israel Prime Minister hi lungngaihna leh indo an hmachhawn laiin ka sawisel tur a ni lo,” tiin Haley chuan a thusawinaah a sawi a ni. Haley chuan hun liam taa Tump-a’n Chinese Communist President Xi leh North Korea, Kim Jong Un thiana a siamte kha a duh loh thu sawiin, “Hengte hi mi tha leh fel te an ni lo. Min inthen darhtir duhtute an ni a, min tihchhiat leh kan rilru tihbuai tumtute an ni,” tiin a sawi a ni. Hmanni-a GOP inthlannaah Haley chuan dinhmun tha tak luah in, “Tuna kan dinhmun ang zel hi chuan kum li chhung buai takin kan awm reng thei lo ang a, inhumhimte leh lemchan reng te hi a theih loh ang,” tiin President lo ni tawh Trump-a chu a hrilh a ni.
Kum 2024 atana GOP President tur thlanna neih tur an inchuhnaah hian Trump-a hian hma hruai zelin tantu 59.1% a nei mek a, Nikki Haley hian pathumna hauhin 8.3% tantu a nei ve mek bawk a ni tih RealClearPolitics polling buatsaihah an sawi a ni. GOP President thlanna tura campaign neih leh hun tur chu Nevada Caucus-ah niin February 8, 2023-ah a ni leh dawn a ni.
Nikki Haley-i’n Donald Trump hnial
