Zoram thlasik vanglai a ni a, January hi a vawh ber lai a ni thin. Kuminah pawh a vawt mek a, a tehna lamah chuan nikum January aia a vawh chang a awm.
State Meteorological Centre chhinchhiahna enin, nikum January ni 9-ah khan a vawh ber laiin 10°C a ni a, 10°C hi 2025 January chauh ni lovin 2025 kum tluana Aizawl vawh ber lai a ni. Kuminah chu aia hniam chu a awm tawh a, January ni 6-ah khan 9°C a ni.
Nikum January thlaa a vawh ber lai aia vawt kumin January-ah a awm tawh a, 9°C hi 2023 hnua a vawh ber lai a ni hrim hrim. 2024-a a vawh ber laiin January ni 12-ah 10°C a ni a, 2023-a a vawh ber laiin January ni 19-ah 10°C bawk a ni.
Lum leh vawt tehnaah hian ni khata a vawh ber lai leh a lum ber lai an chhinchhiah thin a, kumina 9°C a thlen ni January ni 6-ah khan tarlan tawh angin a vawh ber laiin 9°C a ni a, a lum ber laiin 20°C a ni. 20°C hi a lum lo a, 9°C leh 20°C chawhrualin khami ni kha mihring tan a vawt ang.
January ni 4-ah khan a vawh ber laiin 10°C a ni a, a lum ber laiin 18°C a ni. Hemi ni pawh hi, 10 leh 18 a inthlauh loh avangin a vawt ang. January ni 5-ah pawh a vawh ber laiin 10°C a ni a, a lum ber laiin 18°C a ni.
Tun hnai, January thla chawhnu lamah a tehna lamah hniam lutuk lo mah se khua a vawt a, tlai lam atangin a vawt zual thin. Hei chhum hnawng a awm vang a nih theih thu leh chhunah pawh ni a kang vak lo thin a, chuvang chu a ni thei, State Meteorological Centre lam chuan an ti.
January chu vawt tura ngaih a ni sa a, tun hnaiah khua hi a vawt rei telh telh a ang bawk; nikum khan February-ah khua a la vawt ang reng. Amaherawhchu, ruah sur leh sur loh athu a ni thei, ni a lan that leh lan that loh azir a ni thei bawk.
Nikum January aiin a vawt
