Nikum khan Mizoramah thosi atanga natna kai theih – Malaria, Dengue leh Chikungunya vei hmuhchhuah an ni vek a, malaria chiah thihpuitu awmin, mi 7-in nunna an chan.
Health & Family Welfare department hnuaia National Vector Borne Disease Control Programme (NVBDCP) chu Thawhlehni khan an dinhmun thlirletin an thutkhawm.
Report danin, kum 2024 chhung Mizoram pumah Malaria vei 16899 hmuh an ni a, an zinga 8950 hi Malaria Pf niin, malaria natna avangin mi 7 in nunna an chan a ni. Kumdang zawng aiin Malaria Pv a pung nia report a ni. Kum 2024 chhung hian Dengue vei hmuhchhuah 744 awmin, Chikungunya vei hmuhchhuah 3 an awm a ni.
Mizoramah district pali – Lawngtlai, Lunglei, Mamit leh Siaha chu malaria tam zual bikna an ni a, a bikin international border – Bangladesh leh Myanmar ramri hrulah malaria hi a hluar zual nia report a ni.
NVBDCP hnuaiah hian malaria natna laka invenna atan thosilen damdawia chiahsa sem thin a ni a, thosilen pangngai damdawia chiah sak bakah chenna in chhung thosi hloa kahte kalpui a ni.
Health Services director Dr Hmingthanmawii chuan natna laka inven kawnga sawrkar hmalakna hrang hrang tha taka kalpui mek a ni tih a sawi a. Mizoram chu India ram state hrang hrang zinga malaria tam na ber state a ni, tiin, thawktuten an awmna hmun theuhah tha thlah loa an beih takzet a tul tih a sawi a ni.
Nikumah malaria thihpui 7 awm
