Kum 2024 kumhlui leh 2025 kumthar chuankai lawm laia sawrkarin a khap halpuah leh halmawi hal/ zuar mi 53 man an ni a, an zinga 14 chu court-in thiam loh a chantir.
Home minister K Sapdanga hoin Committee on Prevention of Firecracker and other Pyrotechnic Materials chu Ningani khan an thukhawm a. Kumin hunpui vuakveta halpuah leh a kaihhnawih khap dan tur bakah Working Committee-in halpuah leh a kaihhnawih khapna tur dan a duan thar (draft bill) an thlirho.
Nikum hunpui laia halpuah leh a kaihhnawih hal chi chi hrang hrang khapna Mizoram sawrkarin a kalpui tawh dan Aizawl SP Rex Zarzoliana Vanchhawng chuan a sawi a. Nikum hunpui vuakvet khan halpuah leh a kaihhnawih hal, lei leh hralh bakah siam chhuah kaihhnawihah mi 53 man an ni a, heng zinga 14 chu thiam loh chantir an ni. Mizoram Police leh tlawmngai pawl tangrualin halpuah/ halmawi an man hlut zawng hi Rs 23,13,555 hu a ni.
Thutkhawmah hian kumin hunpui lo thleng turah mipui vantlang him zawkna atan leh boruak thianghlim zawk a awm theihnan hmalak dan tur rel a ni a. Working Committee buatsaih, halpuah leh a kaihhnawih khapna tur dan thar duan mek thlirho niin, a thuphungin Committee hian a pawm a; thutkhawm leh huna ennawn atan dah a ni.
Nikumah sawrkarin a khap halpuah hal/zuar 53 an man
