Lalthara-te Unau Foundation (LUF) chuan ‘Thilsiam Chhantu Pasaltha’ tih hming puin environment humhalh kawnga hma la tha mi paruk hnenah nimin khan chawimawina an hlan a. LUF hian nikum khan pawl panga hnenah chawimawina an lo hlan tawh bawk a. Hetiang hian kum tin, environment humhalh kawnga thawk tha thlanchhuahte hnenah chawimawina hi hlan an tum a. He foundation bul tan nan hian an unauin cheng nuai 105 an thawhkhawma a, an tu leh faten an la kalpui zel dawn a ni.
Ram leh hnam hmangaihna (nationalism) chungchang hian vei a hlawh thin a, a sawifiah lamah thahnem kan ngai thin a, a taka thawh chhuah lamah erawh kan hniam, a tih theih awm e. Tuna LUF hmalakna ang hi, ram leh hnam hmangaihna tak tak rilru atang lo chuan a lo chhuak thei hauh lovang tih a lang chiang nghal a, hetiang hi ramin a mamawh chu a ni ber.
Chawimawi leh fak hlawh beisei vang ni hauh lova mahni thahnemngaihna zawna environment pawimawhzia hriaa a humhalh kawnga ke lo pen tang tang thinte hi an hluin an ropui em em a. Chutih rualin, hetiang mi thahnemngaite chawimawi nachang hriaa hmalatu LUF te pawh hi an hlutna leh an ropuina a nep zawk chuang hauh lo a, an thiltih hi environment humhalhna hmanrua pawimawh em em mai a ni. Chawimawi phua thil titute an ropui a, chawimawi nachang hriate pawh an hlu a ni.
Environment pawimawhzia hi kan inhrilh nasa ve ta hle a, a thu chuan kan hre tlang viau hlawm tawh awm e. Mizote hian tawnhriat kan la neih tlem avang hian, mithiam zawkten nasa taka an lo zirchian hnua an sawite hi a taka kan tawn ve dawt hma chuan kan awih mawh thin khawp mai a. A thatlohnain min han ben harh meuh hi chuan kan lo tlai hman ziah, a tih theih awm e. Environment humhalh chungchangah pawh hian, tunhmaa kan lo ngaih pawimawh zawh tawklohna khan tunah hian min beng thawi feih feih tawh a, hei hi kan ngaihthah reng chuan min la beng thlu tawp mai dawn a, chutih hunah chuan thawh tum mah ila, kan tlukna lamah kan insawh sil nasa hman hle tawh ang a, a tlai tawh dawn a ni. Environment hi priority No. 1-a kan dah a pawimawh takzet a ni.
No-1-ah Environment
