Central sponsor scheme hna chak taka thawh a nih theih nan, central atanga fund lokal chu state sawrkarin single nodal agency hnenah rang taka hlan zung zung a tum dawn tih chief minister Lalduhoma chuan a sawi.
Thawhlehnia All Mizoram Centrally Sponsor Scheme Coordination Committee hruaitute nen an inkawmna kaihhnawihah chief minister hian, CSS hnate chak taka thawh a nih theih nan state sawrkar chuan central atanga fund lokal chu single nodal agency hnenah rang taka hlan zung zung a tum tlat dawn tih sawiin, “Kan thawh chak a, utilization certificate kan pek thlak hma hian fund dang a lo thleng leh rang a, hma sawn chak turin chutianga kal theih chu a tul kan ti hle,” a ti.
Financial year tawp lamah sawrkarna an vuan a. Tunhnai lawk khan central lamin nitina state-in sum a kawl theih zat a rawn titlem bawk a. Hei vang hian chak taka kal theih a ni rih lo tih mipuiin an hriatpui an duh hle tih Lalduhoma hian a sawi a. An lo sawi tawh angin, state sum dinhmun titha chho turin nakum hi inpuahchah kum – year of consolidation atan kalpui an tum tih a sawi.
“Inren takin kan awm anga, Resource Mobilization Committee-in chak takin hma a la anga, eirukna awm loin kan kal bawk anga, kum khat hnuah chuan kan ziaawm chho hle turah kan inngai,” tiin, hmanhmawh taka hna thawh nghal a harsat rih thu a hrilhfiah. An mamawh thlente chu tunhma atanga a lo hriatpui leh a veipui takte an nih thu a lo sawi a ni.
Chief minister tawiawmtu commissioner & secretary to chief minister K Lalthawmmawia chuan, Mizoram CSS Employee-te dinhmun chawikanna atana zirbingtu pawl ‘study group’ sawrkarin ama kaihhruaina hnuaia a lo din tawh thu leh an zirchianna pawh kum 2021-a an thehluh tawh thute a sawi a. An report tlangpui a sawifiah bawk.
Heng an zirchiannate a taka hmang tura chinfel ngai a fel thuai theih nan, vawiin – December 20-a cabinet thutkhawm ni lo, thutkhawm leh hmasa bera a lo chhawpchhuah tur thu chief minister hian All Mizoram CSS Coordination Committee hruaitute hi a hrilh.