Greater Noida-ah Pathianni tuk khan chemical factory-ah kangmei nasa tak a chhuak a, industrial unit-ah thil puak ring tak tak pawh hriat a ni a. He thil hi zing dar 3:25-a Shri Banke Bihari Aromatics factory-a chhuak a ni.
Thil puak avang hian thawktute chu an himna atan unit atang hian an tlan chhuak hlawm.
Thuneitute chuan thi leh hliam an awm an hre lo va, kangmei chhuak hian factory hi a tichhe nasa hle thung tih an sawi.
Video leh thlalak thehdarhah chuan kangmei chhuak hian mei khu dum tak a chhuah a, van lamah a inzial chho nasa hle tih a lang.
Kang thelhna hmanrua 20 chuang thawh chhuahpui a ni a, darkar sarih dawn hnuah thelh mih theih chauh a ni tih thuneitute chuan an sawi.
Police chuan mihring insasengte bakah factory chhunga dah bawng 25 vel an chhanchhuak tih an sawi a. Factory bang hi tichhiain an la chhuak tih an sawi.
“Chemical plant Shri Banke Bihari Aromatics, Dujana Road-ah kangmei a chhuak tih thu kan dawng a, hei hi Badalpur police station huam chhunga awm a ni a. Rang taka che chhuakin Fire Service Unit an thlang zui nghal a, kang thelhna hmanrua 32 hmangin thelh mih tawh a ni a, thi an awm hriat a ni lo,” tiin police hotu lianin a sawi.
Kar hmasa tir lamah khan Noida-ah hian thawmhnaw lam chi zawrhna dawr chhung hnih kangah hmeichhia kum 34 mi a thi a, a pasalin hliam na tak a lo tuar bawk a. Kangmei a chhuah lai hian dawr neitu, Rohit Sharma leh a nupui, Vinita hi chhawng hnuai zawkah an mu a, fire department chuan an chhanchhuak a; damdawi in panpui nghal ni mah se Vinita-i hi enkawl laiin a thi a ni.
Noidi-a chemical factory-ah kangmei nasa tak chhuak
