Non tribal ho laka invennan Mizoramah UCC hman nise – K Hrahmo

Non tribal ho laka invennan Mizoramah UCC hman nise – K Hrahmo
Non tribal ho laka invenna atan Mizoramah Uniform Civil Code (UCC) hman ni ve ngei se a duh tih BJP MLA K Hrahmo chuan a sawi.
Thawhtannia an party State office-a inkhawmah BJP State Core Group member K Hrahmo chuan, central-in dan thar a introduce dawnin Mizoram mipuiin politics thila inbeihna atan kan hmang fo a, kan hriatchian lem loh leh kan hriatthiam vak loh vangte in dan thar tur kan lo hlauin, kan insawithaih vak thin a, chutih laiin a huna dan kan duh loh, a hnu a tha leh si kan nei ta nual tih a sawi.
UCC chuan tribal-te a huam loa, tuna state thenkhat UCC hmang mekte pawhin an state chhunga tribal-te a huam tir lo tih sawiin, Mizorama UCC kan hman a tul chhan kan ngaihtuah chian a ngai tih a sawi.
“Mizoramah non-tribal engemawzat an awm a, chu’ng non tribal awmte chuan nupui nei reng chungin Mizo hmeichhia an rawn nei leh thin. Mizo nupuia neite chuan an nupuite hmang tangkaiin sumdawnna (business) an rawn kalpui a, an sumdawnna a tlakchhiat chuan Mizorama an nupui fanaute chu an chhuahsan leh mai thin. UCC danah chuan miin nupui pakhat chauh a nei thei a, chutih laiin, an lo inthen palh a nih pawhin hmeichhiate tan ro insem chungchangah dan mumal tak a awm a, Mizo hmeichhiate non tribal-te laka kan venna atan UCC kan hman hi a pawimawh hle,” a ti.
Congress party-in politics-a hamthatna an duh vangin Mizoram mipui hnenah a hlauhawm thei ang bera UCC an sawi thin avangin tam takin UCC chu enge a nih kan hriatchian hmain kan lo hlau em em tih BJP MLA hian a sawi a. UCC hi tribal state-te hian kan mamawh zawk dan pawh kan zirchian a pawimawh a, Mizo hmeichhiate non-tribal ho laka bum an tawh lohnana kan venpuina tur pakhat a ni tih a sawi a ni.