Non tribal zingah ram nei an
awm tih sawi hi enfiah a tul
– Dr R Lalthangliana
MNF leh India sawrkar inremna in a hrinchhuah zingah Mizoramah non tribal-ten ram an nei thei loa, mahse tunhnaiah ram nei an tam tawh nia sawi chu enfiah a tul hle tih MNF hruaitu Dr R Lalthangliana chuan a sawi.
Thawhtannia Mizo Hnam Runa inkhawmah MNF senior vice president Dr R Lalthangliana chuan, India ramah Peace Accord ziah a ni nual tawh a. A hlawhtling ber chu ‘Mizoram Accord June 30 1986’ a ni tih a sawi.
MNF underground hruaitu Pu Laldenga leh Pu Zoramthanga leh hruaitu hmasate ngaihtuahna fel vang a ni, tiin, “Mizo mipui inpekna leh tanrualna avangte, ram leh hnam tana martar-te avanga hlawhtling a ni. He accord hlawhtling tak avang hian Pu Zoramthanga chief minister a nih laiin Peace Bonus sum thahnem tak kan dawng hial a. MNF leh India sawrkar inremna a ni mai loa, khatih laia Mizoram sawrkar aiawhte inremna a ni,” a ti.
He inremna, memorundam of settlement-in Zofate tan rahchhuah tha tam tak a neih zingah, Constitutional Amendment 53 Article 371(G) dah belhin, hemi chhungah hian Mizo sakhua leh khawtlang nun thilah, Mizo hnam dan leh hman danah, criminal leh civil thubuai rem, ram neitu leh inhlawnchhawn, Mizoram sawrkar office tawng emaw mi zawng zawng hman tur thlan theihna, hnam tlem zawk venthat leh humhalh sak zel chu Mizoram Legislative Assembly remtihna lo chuan India Parliament dan siam reng reng Mizoramah hman theih a ni loang, tih a chuang tih a sawi a ni.
Inner Line Regulation kan hman mek chu state sawrkar rawn lo chuan siamthat /paih theih a ni lo tih a chuan thu a sawi bawk.
“Mizo nationalism meichher min chhitsaktu kan hruaitute leh nunna hial hlantute zahna chibai kan buk thar a. Inremna thuthlungin a tha zawnga nghawng chhuah a neih zel hi MNF-in a ngaihpawimawh zing ami a ni. Peace Accord angin non tribal-ten Mizoramah ram an nei thei loa, mahse ram nei an tam tih sawi a awm fo hi enfiah a tul hle,” MNF senior vice president hian a ti.
Non tribal zingah ram nei an awm tih sawi hi enfiah a tul – Dr R Lalthangliana
