Australian Open inbuatsaihna tournament lian Brisbane International-ah nimin khan Nick Kyrgios chuan kum 2025 March thla hnu lama a vawi khatna atan ATP Tour singles match khelin first-round a paltlang zo lo a; Thawhlehnia khelmual lut dang Britain star Cameron Norrie erawh a chak thung.
Hliamin a tihbuai theih tak Australian Kyrgios hi minute 65 chhungin American Aleksandar Kovacevic chuan 6-3 6-4-in a hneh a, second round a lut zo lo. Kum 30-a upa ni ve tawh Kyrgios hian ATP ranking lamah chhuan tur nei ta rih lo mah se kan hma lawk Melbourne Park-ah hian wildcard hmanga inlan theih a inbeisei mek a; chu mi atana inbuatsaihna Brisbane singles lamah tla fel tawh mah se vawiin hian a kawppui Thanasi Kokkinakis nen doubles round of 16 match an khel zui leh dawn a ni.
Pathianni khan Kokkinakis nena tangdun hian Matthew Ebden leh Rajeev Ram lakah hnehna an lo sualchhuak tawh a, last 16 lamah hian Sadio Doumbia leh Fabien Reboul thawkdun an hmachhawn leh ang.
Season liamta hnuhnung pathuma ATP singles match ruk chiah khel tling Australian Kyrgios hi ATP ranking lamah pawh tlahniam vawn vawn tawhin, tunah hian world number 670-na a ni duai tawh!
58th-ranked Kovacevic nena an inkhelh lai pawh khan a kiu a dawm leh vawng vawng a, hlauhthawn ang em chuan a inhnukdawk ta lo a!
Brisbane khawpuia first round pawh a paltlang zawh leh tak loh avang hian nikum a home tournament first round match pakhata Britain player Jacob Fearnley a hneh loh hnua major tournament la khel leh ta lo Kyrgios tan an ram Grand Slam-a inlan beiseina a chau hle a, a beisei angin wildcard an pe dawn em hriat theih a ni rih lo!
Tarlan tak angin, vawiin hian men’s doubles lamah a chipui Thanasi Kokkinakis nen an chechhuak leh ang a, karleh hian Melbourne khawpuia Kooyong Classic warm-up exhibition event lamah a inlan chhunzawm leh ang.
Thawhlehni inkhel dangah Cameron Norrie chuan darkar thum chhunga inbeihna hautakah Frenchman ranked 36th Ugo Humbert chu 1-6 7-6 (8-6) 7-5-in a paltlang hram a, Kyrgios hnawtchhuaktu American Kovacevic a hmachhawn zui leh ang.
Kum 30-a upa Briton Norrie hi world number 28 ni mekin, singles ranking lama a tawn san ber chu kum 2022-a pariatna lai a han luah chhoh ve kha a ni a; Nick Kyrgios-a ranking that ber hun ve thung chu kum 2016 daih tawha 13-na a thlen ve kha a ni.
Norrie chak, Kyrgios tlawm
