North America-ah ‘Superman’ a la thlawk chak ber
‘Superman’ film chuan tun weekend kalta khan North America-ah cinema hall ticket hralhna atangin dollar maktaduai 57.25 la lut lehin, box office No.1 a la ni a, hetihrual hian ‘Jurassic World Rebirth’ pawhin dollar maktaduai 600 a la lut tling ta a, film tlangzarh thar “I Know What You Did Last Summer” leh “Smurfs” te pawh box office top 10-ah an lang. Box office ranking hi weekend (Zirtawpni-Pathianni) chhunga US-a cinema hall ticket hralhna sum chevel atanga tehin siam thin a ni.
‘Superman’ hi a opening weekend, weekend hmasa zawk nena khaikhin chuan ticket hralh hi 54%-in a tlahniam a, hetichung hiana weekend vawi hnihnaah cinema hall ticket hralhna atangin dollar maktaduai 57.25 la lut lehin, box office No.1 a la ni a, an tlangzarh atanga ni 10 chhungin US-ah dollar maktaduai 235 a la lut tling ta. US pawn, ramdang atangin dollar maktaduai 171.8 la lut tawh bawkin, tihian ni 10 chhunga kawvel huapa a lak luh chu dollar maktaduai 406.8 a tling ta a ni.
‘Superman’ film thar hi James Gunn direct niin, David Corenswet chu Superman lemah changin, Rachel Brosnahan chu Lois Lane lemah changin, Nicholas Hoult chu Lex Luthor lemah a chang ve bawk.
Marvel lam pawhin an superhero movie ‘Fantastic Four: First Steps’ chu July ni 25-ah an tlangzarh dawn a, he film hi opening weekend-ah US-ah dollar maktaduai 100 chunglam la lut turin an chhut a, chuvangin ‘Superman’ competition lian tham tak a hmachhawn hmain hun a ngah tawh lo.
Jurassic World Rebirth-in US-ah dollar maktaduai 23.4 la lut lehin No.2 a la ni a, he film hian US-ah dollar maktaduai 276.2 la lut tawhin, US pawnah maktaduai 371.8 a la lut tawh bawk a, tihian khawvel huapin dollar maktaduai 647 a la lut tling der tawh.
Horror movie reboot “I Know What You Did Last Summer”-in dollar maktaduai 13 la lut lehin No.3-ah a debut a, US pawnah maktaduai 11.6 la lut bawkin, tihian opening weekend-ah dollar maktaduai 24.6 a la lut ve nghal bawk. He film-ah hian Jennifer Love Hewitt, Freddie Prinze Jr., Brande leh Sarah Michelle Gellar ten a original film-a an role ngai an rawn chang leh vek a, Madelyn Cline, Chase Sui Wonders, Jonah Hauer-King, Tyriq Withers, Sarah Pidgeon leh Gabbriette Bechtel te an inlan thar.
A original film hi 1997 a tlangzarh kha niin, kum 30 dawn hnuah an rawn thar thawh leh ta a, a original film thawnthu kha zui zelin, thian rual khatin an tihpalh avanga nunna chan pakhat thup an tum dan leh, chu thil thlen atanga kum khatnaa anmahni thah tumtuin a veh zui tak dan vel tarlanna a ni.
Film tlangzarh thar dang ‘Smurfs’-in dollar maktaduai 11 la lutin, No.4 a ni a, US pawnah dollar maktaduai 22.6 la lutin, weekend hmasa a Australia-a dollar maktaduai 2.4 a la luh nen chuan khawvel huapin dollar maktaduai 36 a la lut nghal thei a ni. Animated movie, ‘Smurfs’-ah hian Rihanna pawhin a aw a thawh a, ‘Smurfs’ tana a aw a thawh vawi khatna a ni.
Brad Pitt channa ‘F1: The Movie’ chu box office top 5 khartu niin, dollar maktaduai 9.6 la lut lehin No.5-a la ni a, he film hian khawvel huapin dollar maktaduai 460.8 a la lut tling tawh a, Joaquin Phoenix leh Pedro Pascal te channa, film thar ‘Eddington’-in dollar maktaduai 4.2 la lutin, No.7-ah a debut bawk.
Box office top 10:
1 Superman $57,250,000
2 Jurassic World Rebirth $23,400,000
3 I Know What You Did Last Summer $13,000,000
4 Smurfs $11,000,000
5 F1: The Movie $9,615,000
6 How to Train Your Dragon $5,350,000
7 Eddington $4,255,607
8 Walt Disney $2,000,000
9 Lilo & Stitch $1,500,000
10 28 Years Later $1,340,000
North America-ah ‘Superman’ a la thlawk chak ber
