North leh South Korea inngur

North Korea chuan kum nga kaltaa Seoul nena ‘military tension’ tihziaawm nana inremna an siam chu a hnawl ta.
Tun hnaia Pyongyang-in hlawhtling taka spy satellite a kahchhuah thu a puan atanga intan a ni a.
Hei vang hian South Korea chuan inremna an lo siam tawh atangin thenkhat chu a hnawl nghal thu sawiin ramri hnaiha surveillance a kalpui zui tur thu a lo sawi tawh a ni.
Pyongyang chuan chhang letin Seoul aia na zawka kalin inremna a hnawl piah lamah sipai tam zawk leh ralthuamte ramri hnaihah a chhawp nghal thu a sawi bawk.
“Tun atang chuan kan sipaite chu September 19 North-South Military Agreement in a tibuai tawh lovang” tiin thuchhuah siamah tarlan a ni a.
Hmun tin lei lam, tuipui leh vansanga sipaite inbakaihna awm thei ven nana ruahmanna siam te chu hnuhdawh vek a ni, tia sawi bawkin, ‘ramri hnaihah sipai chak leh tam zawk bakah military hardware te chhawp a ni ang’ a ti bawk.
Pyongyang chuan Thawhlehni khan spy satellite Malligyong-1 chu hlawhtling taka a kahchhuah thu a puang a ni.
South Korea military-te chuana hnu lawkah satellite chuan orbit a luh thu sawiin mahse ruahman anga thawk a ni dawn em tih sawi nan a la hma lutuk a ti thung a.
Seoul chuan spy satellite kahchhuah chu na taka demin top officials te chuan ramriah surveillance operation neih zui nghal ni se an ti a, tihian South chuan North Korea outpost leh long-range artillery te chu a thlithlai reng thei tawh dawn a ni.
Chu tak chu kum 2018-a Comprehensive Military Agreement siama no-fly zone ruahman bawhchhiatna a ni zui a. Kha inremna kha ram pahnih hruaitu tena boruak sosang tihreh a nih theih nana an hmalak dunna a ni.
Mahse North Korea chuan inremna siam chu tun hnai kum hnih chhungin a bawhchhe fo thung a, missiles leh artillery round te chu South lam hawiin tuipuiah a kap fo a ni. Nikum December khan South Korea nena ramri bualah drone tirchhuak bawkin pakhat phei chu Seoul thlengin a thlawk a ni.
Chungte chu South Korea-in North Korea chuan inremna engahmah a ngai chuang lo tia hnawl a remtihna a ni bawk a. Analysts te chuan official taka North-in inremna a hnawl chuan engmah danglamna vak a thlen phah dawn chuang lo an ti bawk.
“A chhan chu North Korea chuan inremna a zawm lo hrim hrim phawt a, chuvangin inbeihna thleng thei reng a ni sa hrim hrim” tiin Jo Bee Yun, Korea Institute for Defence Analysis chuan a sawi.
Ram pahnihte chuan boruak tisosangtuah an inpuh tawn ve ve chu Jo Bee Yun chuan ‘politics thila ha aiah ha, mit aiah mit’ tihna mai a ni a, ‘a tak takah inbeihna a thlen ang’ tihna a ni lo tiin a sawi bawk a. North chetlak dan tur zawk a zirin thil a thleng ang tiin a sawi.
Spy satellite a kahchhuah chu North chuan ama inven nana tihmakmawh a ti a, mahse, South Korea, US leh Japan te chuan na takin an dem thu an sawi thung. Spy satellite neih hi North in five-year military plan a siam zinga tel a ni.