Goal thum thuna kumin Fifa World Cup khelh zawh taka a thlengtu pui ber United States tana top scorer ni ta Folarin Balogun-a red card an kaltlangpui rih loh (suspend) boruak khan hlet nei chho zelin, a red card hmuhna match-a an tumpui pawh ni miah lo Norway chuan Fifa duhsakna uchuak dawnga Balogun-a hremna an thulh rih ringawt kha an khinglet dawn em tih an ngaihtuah dawn!
Norwegian Football Federation (NFF) chuan Fifa ethics committee hnena automatic one-match ban tawrh theihna straight red card sut leh rih a nih chungchangah formal complaint thehluh chi a ni em tih an rel dawn tih thuchhuah siamin an tarlang.
United States forward Balogun khan si hnih faia Bosnia-Herzegovina an hneh tumin straight red card hmu mah se US President Donald Trump a inrawlh a, football-a politik lakluh duh lo inti ber leh politician-te’n football kaihhnawiha huhang leh thiltihtheihna an lantir do inti em em thin Fifa chuan a chhan pawh tarlang eih loin red card avanga match khat hrem ngei ngei tur kha thla 12 chhung atan hremna an hnukkir ta ringawt a!
He tih chhunga red card hmuhna khawpa a chetsual leh chauhin hremna hmasa kha a nung ang!
Khati a nih tak avang khan last-16 match pakhata Belgium hmachhawn thei lo tur kha Belgian game-ah a inlan a, 4-1 ngawtin American-ho kha an tlawm zui ta tho a!
Kha thil khan sawisel a hlawh nasa hle chungin official taka complaint thehluh thawm hriat tur a awm chiah lo a, tunah Norwegian-ho an lo lang a, NFF president Lise Klaveness chuan BBC hnenah an federation-in hremna lekkawh tak loh chungchang kha ngaihtuah ngai hlea an ngaih thu leh board meeting an koh leh hmasakberah formal complaint an thehlut dawn em tih chu ngaihtuah tura chhawpchhuah an tum thu a hrilh.
Mihring nungchang dik leh mipui mimir pangngai em emna rama an football federation hian President Trump-a kuta Fifa Peace Prize hmasaber an hlan teh ngawt pawh kha na taka dodalin, complaint hial an lo thehlut rap tawh a, tuntuma Fifa chet dan zek zuk pawh hi board meeting-ah an han ngaihtuah leh ang a, complaint an thehluh leh ngei a rinawm!
Klaveness chuan, “Nikum Krismas hma Washington khawpuia World Cup draw laia Fifa-in peace prize award an tih emaw ni anhlan ngawt kan dodal ang bawk khan Balogun-a case pawh hi kan dem a, Fifa ethics committee-in an chhuichiang ngei tur a ni,” a ti.
An thuchhuah siamah hian Trump leh US team baka Argentina leh an captain Lionel Messi laka duhsakna uchuak lantira puh leh chu mi avanga mi ngei leh hmuhnep hlawh mek Fifa president Gianni Infantino chet dan pawh International Olympic Committee (IOC) lamin chhuichiang ngei se an duh tih an tarlang tel!
Infantino hi kum 2020 atang khan IOC member a ni nghe nghe.
Olympic charter section two-in a tarlan danin: ‘IOC member tawh phawt chuan sawrkar, pawl (organisation leh eng party leh huhang thu leh hla mah a pawmin, a zawm tur a ni lo a, pawl tana an chet dan leh vote thlak dan tur herdanglam tura hriattirna leh nawrna an dawn reng reng pawh an hnawl fithla zel tur a ni’ tih a nih laiin US president Trump-a khan American forward hremna hlihsak chungchangah Infantino kha direct-in a nawr tih US president ka atang ngeiin hriat tur a awm a, chuti a nih chuan Fifa president hian IOC dan a bawhchhia tihna a ni a, chu chu chhuichian tlakah Norwegian Football Federation lam chuan an ngai nghet hmiah bawk a ni.
Red card vanga hremna kaltlangpui loh chungchanga Trump leh Infantino phone call chungchang US president ngeiin a sawi chhuah hnu leh Belgium hmachhawn thei tura straight red card hmu fel diam tawh Balogun-a an sezawl chhuah tawp hnu khan US president chuan Fifa thutlukna fakin, khawvel hriatah ‘great decision’ tiin a sawi zak lo!
July ni 6 khan Oval Office-a news conference a kohah president Trump chuan, “Gianni ka bia alawm. Thil thlen dan kha ka hmu ve ngei a, infiamna ngaina mi ka nih angin sports hi ka hrethiam ve lutuk a, chu mi engah chuan kha thil kha foul a ni lo.
“Nia, Fifa hnenah referee thutlukna kha ennawn turin ka ti a, an pawla zahkai tak pakhat pawh ka be ngei a, foul-a ka ngaih loh avangin hremna an lekkawh kha ennawn leh turin ka hrilh a, an tihtur em em erawh keia hrilh theih a nih loh avangin an thutlukna siam dan tur thleng thleng chuan ka kawhhmuh lo,” a ti!
Royal Belgian Football Federation lam pawh kha thilah khan an lungawi lo a, football-a awmphung pangngai tur (ethics) bawhchhiat a nihna kha an ngaithutak hle tih sawi chungin ethics lungphum humhim tur te, competition fair tak a awm theihna’n leh football thatna tura beih zui zel an tum thu an puang.
Fifa lam hian Belgium ngenna hnawlin Balogun-a red card an ‘suspend’ chhan an puang duh lo a, chuti a nih takah chuan ‘appeal’ ngaihna pawh a vang hle a, he thila Fifa chet dan pawh hian dem a hlawh hle a ni.
European football thuneitu sang ber Uefa pawhin Fifa thutlukna kha na takin an dem a, red line an pel hial tawh nia sawiin, red card ken tlang loh chungchanga an thutlukna siam teh ngawt kha ‘tun hma lama la awm ngai lo leh hriat tur awm ngai lo, pawm theih loh leh sawifiah ngaihna awm lo’ ti hialin demna an tichhuak.
Eufa hian Fifa president thlan leh huna Infantino an thlawp loh tur thu an sawi chiang tawh nghe nghe!
Fifa duhsakna uchuak dawnga ngaih leh pawm ngheh Argentina pawhin khawvel pumah thlawp an hlawh lo nasa ta hle a, hming ziaka ngaihdan khawnkhawmtu pawl lamin signature campaign an kalpuinaah mi maktaduai chuangin World Cup-ah Argentina tel lo se an duh tih hming ziakin an lantir niin media lamah tarlan a ni!
Norway-in Balogun-a red card hremna hnuhkir khinlet chungchang an ngaihtuah dawn
