‘Nothing Comperes 2 U’ hla satu Sinead O’Connor a thi

‘Nothing Comperes 2 U’ hla satu Sinead O’Connor a thi
Irish zaithiam hmingthang, Grammy Award pawh dawng tawh ‘Nothing Compares 2 U’ tih hla satu Sinead O’Connor, kum 56, chu Nilaini kalta khan a thi tih BBC-in a puang a, a chhungte chuan BBC hnena an thu thawnah, “Lungngaihna vawrtawpin min tuam chungin kan hmangaih Sinead chuan min kalsan ta tih kan puan a tul ta si. A chhungte leh a thian ten he hun lungchhiat thlak tak kan tawh lai hian kan privacy min zah dak turin kan ngen che u a ni,” an ti. Sinead O’Connor thih chhan hi puan a la ni lo.
A lu a ziat kawlh a, a mit-beh a beh a, chutiang chuan 1980s kum chawhnu lamah rimawi khawvelah a rawn tal lut a, rock leh metal-in rimawi khawvel an al hneh vanglai a ni lehnghal a. 1987-ah ‘The Lion and the Cobra’ a tichhuak a, he hla hi kum 20 mi chauh ni a a fa hmasa ber a pai laia a record a ni nghe nghe.
A aw chak tha zet mai chuan ngaihven a hlawh nghal hle nain, 1990’s-a ‘I Do Not Want What I Haven’t Got’ tih hla chu rimawi khawvela a din chhuah tan tak takna hla a ni ta a ni. Chutah khawvelin a hriat lar takna hla, Price hla a cover ‘Nothing Compares 2 U’ a tichhuak leh a, a music video fuh zet mai nen, a hunlaia zaithiam lar ber te zingah a invawrh chhuak ta a ni.
O’Connor hi luhlul ve tak mai a ni a, Irish Republican Army a tan thu te pawh a puang hreh lem lo a, Irish band khawvel huapa huhang nei lian U2 te pawh a sawisel hreh chuang lo. 1990 May thlaah comedian Andrew Dice Clay nena Saturday Night Live-a inlan tur a ni a, mahse, a perform duh lo lui ve thak. New Jersey-a a perform duh loh avangin Frank Sinatra nen pawh an inhmu chhe viau a, hetah hian stage-a a inlan hmain national anthem an play dawn tih a hriat avangin perform duh lo a ni. Hei vang hian radio thenkhatin a hla an play duh loh phah a, Sinatra pawhin, “a mawngah ka pet zawt dawn emawni chu le,” a ti hial a ni.
Mahse, kum hnih hnuah SNL-ah an sawm leh a, Bob Marley hla “War” a cappella version-in a perform a, a hla sak tawp dawnah camera lam enin Pope John Paul II thlalak a pawtthler a “hmelhma dik tak chu bei rawh u” tiin show producer te pawh a barakhaih chiang hle a ni.
A laiah hming chu Sinead Marie Bernadette O’Connor a ni a, December ni 8, 1966 khan Gleanageary County, Dublin, Ireland-ah a piang a, kum 8 mi chauh a nih laiin a nu leh pa te an inthen a, a nau pahnih te nen a nu bulah khawsa zuiin, a naupan lai hian tihduh dahna a tawk nasa hle niin a sawi thin. A tleirawl hlimah dawr atangin a man pe lo va thil lak ruk avanga, a nungchang tha lo thenkhat avangin reform school leh boarding school-ah te a awm zak zak a, kum 15 mi a nihin Irish band Tua Nua drummer-in a zai a lo ngaithla fuh a, hemi tum hian Barbra Streisand hla ‘Evergreen’ a, zai lama kal turin a fuih ta a ni.
O’Connor hian Dublin-a College of Music-ah zai leh piano a zir a, chutah 1980s kum hmasa lamah London-ah a pem a, hetah hian U2 guitarist Edge nen 1986 khan The Captive soundtrack atan an thawk dun ta a ni.
1992-ah album ‘Am I Not Your Girl?’ a tichhuak a, beisei a pha lo hle. A thawm a reh deuh vang vang a, rimawi khawvel a chawlhsan dawn tih thawm te a awm a, 2000-ah a chawr chhuahna Irish folk lamah kirlehin ‘Faith and Courage’ a tlangzarh a, 2002-ah Sean-Nos Nua a tlangzarh leh bawk. 2005-ah ‘Throw Down Your Arms’ leh 2007-ah Theology te a tlangzarh leh a, 2014-ah ‘I’m Not Bossy, I’m the Boss’ a tlangzarh a, hei hi a album hnuhnung ber a ni ta a ni.
O’Connor hian rilru hriselna lamah harsatna a tawk ve nasa a, bipolar disorder a nei tih te, PTDS a nei tih te sawi a awm a, depression te neiin, mahni intihhlum duhna hial te pawh a nei a ni. January 2022 khan a fapa, Shane, kum 17, chu a bo a, an zawn hnuah Ireland-ah a ruang an chhar a, he thihna hi a tuarna hle bawk a ni.
Sinead O’Connor hian a fa pathum a kalsan a ni.