Sawrkar kum kal mekah oil palm rah cheng nuai 600 man chu a chingtute atangin leisak an ni tawh.
Kolasib District Oil Palm Growers’ Association buatsaihin a vawi 1-na atan Zirtawpni khan Kolasib-ah Mizoram Oil Palm Inkhawmpui neih a ni. Heta Godrej Agrovet Ltd. senior executive Lalruatkima report danin, Palm Oil Mill Bukvanneia sawr tur oil palm rah cheng nuai 600 man hu chu Kolasib leh Mamit district-a a chingtute hnen atangin lei a ni tawh.
Oil palm chingtute harsatna sutkianpui tur leh an mamawh ang leitha an lei theih nan te, oil palm rah hralh tura Bukvannei Palm Oil Mill pan thei lo te tan Samadhan- One Stop Solution Centre chu Mamit district-a bun turin hma lak mek a ni.
Oil palm chingtuten kum 2022- 2023 chhungin a rah metric ton 1870 chu Company hnenah an hralh tawh anga chhinchhiah a ni a. Scheme thar- National Mission On Edible Oils-Oil Palm kalpui a nih hnu, 2022- 2023 hian loneitute hnenah kawng hrang hrangin tanpuina pek thin a ni.
Inkhawmpuiah hian Kolasib district-a oil palm tihhmasawnna kawnga hma la tha zual 5 hnenah chawimawina pek an ni a. Aizawl leh Mamit district-a oil palm chingtuten telpuiin Kolasib district-a oil palm huan tam zawk awmna zau panna kawng siamthat dan turte sawi ho a ni.
Oil palm hi Kolasib district-ah kum 2005- 2006 atanga chin tan a ni a. District ram zau zawng, hectare 138251 atanga chhutin oil palm chin theihna zat hi hectare 14141 anga chhut a ni. Partner company Godrej Agrovet Ltd. in 2014 October 28 khan Oil Palm Mill dinin oil palm chingtute atangin a rah hi leiin an her reng a ni.
Kolasib district-ah chhungkaw 278-in oil palm an ching a, mumal taka a rah hralh thei chhungkaw 182 an awm. District potential area hectare 14141 atangin Ha. 341.5-a chin tawh anga chhut a ni.
Inkhawmpui hmanpuitu Agriculture secretary J Hmingthanmawia sawi danin, oil palm avanga sik leh sa leh ram leilung hausaknaa chhe zawnga nghawng awm theia sawi thin zirchiang turin Mizoramah pilot research studies kalpui mek a ni a. Mizoram hmar lama oil palm rah lei turin Godrej Agrovet Ltd. an awm bakah chhimlama oil palm rah lei turin Patanjali Foods Ltd. changtlung zawka inbun turin ruahman a ni.
Nuai 600 man oil palm lei tawh
![](https://theaizawlpost.org/wp-content/uploads/tap_logo-min-large.jpg)