Russia chuan khawthlang lam, Kursk region-a nuclear power plant-a kangmei chhuak chu Ukrainian drone fuhna vang niin an puh a, Inrinni zan khan Russian power leh energy hmun eng emaw zat beih a ni tih an sawi.
Hliam an awm lo va, kangmei chhuak pawh rang taka thelh mih a ni tih plant-a press service chuan messaging app Telegram-ah a tar lang a. Transformer a chhia a, radiation level erawh a pangngai tih a sawi.
Leningrad region-a lawngchawlhna, Ust-Luga-ah pawh fuel export terminal a kan avangin kang thelhtu tirh an ni tih an sawi a. Region governor chuan Ukrainian drone 10 chuang an kap thla a, a puak perin kangmei a siam ta niin a sawi.
Ukraine chuan Russian puhnaah hian engmah sawi a la nei lo.
UN International Atomic Energy Agency (IAEA) chuan kangmei chhuak chungchang hi an hriat thu leh an director general chuan ‘nuclear hmun hi khawia mi pawh venhim a ngai’ tih a sawi.
IAEA hian a hma atang tawhin Russia leh Ukraine hi nuclear hmun leh a chhehvela inbei tawh lo turin an lo ngen tawh thin.
Ukraine hian Pathianni khan an ram dincham an lawm a, kum 1991-a Soviet Union atanga an indan champha a ni.
President Volodymyr Zelensky-a chuan Pathianni tuka video thuchah a tihchhuahah Ukraine chuan a zalen nan a bei zel dawn tih a sawi.
“Muanna chauh kan mamawh a, muanna hnuaiah chuan kan hma hun chu kan kut a ni dawn a ni,” a ti.
Kyiv-a an ram din champha an lawmnaah hian US palai, Keith Kellogg pawh a tel a, Zelensky-a hian Canadian Prime Minister Mark Carney-a pawh a sawm a, an inbiaka thuthar lakhawmtute pawm an kawm dun zui rin a ni.
UK sorkar an indan hriatpui nan Ukrainian flag-te chu Downing Street-ah tar a ni tih a sawi a. Norway chuan Pathianni vek khan $ maktaduai 693 man air defence system a pe dawn tih a sawi bawk.
Ram pahnihte hian Patriot system pahnih leh missile an lo pe tawh a, Norway hian air defence radar a lo pe tawh bawk.
Pathianni vek khan Ukraine leh Sweden hian ram venhimna hmanrua siam dunna tur an pawm bawk a. Swedish defence minister chuan ‘Swedish ramthuamten Ukraine-a sipaite mamawh a ngaihtuahsak dawn’ tih a sawi.
Hetih lai hian Inrinni khan Russia chuan an sipaiten Ukraine khawchhaka Donetsk region-a khaw pahnih an la tih an puang.
Russian sipaite hi an kal muang ve hret a, Ukraine khawchhak lamah hma sawn hret hretin Ukraine ram 20% an thunun tawh.
Ukraine hi Russia-in February, 2022 atang khan a bei tan a. Tihtawp tuma hmalak mek niin tun thlaah pawh US President Donald Trump-a leh Russian President Vladimir Putin chu August 15 khan Alaska-ah an inbia.
Nuclear plant kangmei chhuakah Russia-in Ukraine puh
