Pathianni zing khan NBA Western Conference final game thumna khelh a ni a. Vawi hnih chak zawn tawh Denven Nuggets in Los Angeles Lakers an hneh nawn leh a, NBA finals an hnaih ta hle.
Western Conference game hmasa pahniha chak zawn tawh Denver Nuggets hian LA Lakers lakah bul an tan tha leh viau. Game thumna quarter hmasa berah point 12 zetin chungnung zawkah an tang nghal. Bul tan tha viau mah se quarter hnihnaah LA Lakers chungnung zawkah an tang ve thung a, point 9 in Lakers hi chungnung mah se Nuggets hian point thuma hmahruaiin chungin chawlhlawk an hmang tho thung.
Chawlhlawk hnu lamah Nuggets an khel tha chhunzawm a, quarter thumna point khatin hnufual zeuh mah se quarter hnuhnung berah an khel tha viau thung a, hnehna pawimawh an sualchhuak nawn leh. Quarter thumnaah team hnihte an innawr tawn nasa viau a, inkhel hmuhnawm takah point khatin Lakers an chungnung a, Nuggets nen an inkar an tizim. Point hniha hmahruai tawh Nuggets hi quarter hnuhnung berah inrintawkna sang zawk nen an inlan a. Quarter hnuhnung berah hian point kua a chungnung zui lehin an khingpuite lakah point 11 in an sang fal a. Series-ah 3-0 hmahruai turin LA Lakers hi point 119-108 in an hneh.
Nuggets hian final game hmasa pathum an lak zawn vangin Western Conference champion nih an hnaih ta hle a. Conference champion ni a, NBA finals khel turin Western Conference final khelh hmabak la awm game liah vawi khat chak chiah an mamawh tawh. NBA chanchinah 0-3 a hnufual tawh chunga an khingpuite lehthal thei team an la awm ngai lo. Hemi a nih vang hian LeBron James-a khelhna LA Lakers hi an tlak ngei rinawm viau a. Team dangte tih theih ngai loh ti a, Nuggets an hneh let thei a nih chuan NBA play-off record thar an siam thung ang.
Lakers an hneh nawn leh tum hian Nuggtes tan Nikola Jokic leh Jamal Murray te an inkawp fuh viau a, an ni pahnih point hmuh belhkhawm hi point 61 zet a tling. Jamal Murray hian point 37 a thawkchhuak a, MVP vawi hnih ni tawh Nikola Jokic hian 24 a thawkchhuak ve bawk. Denver Nuggets leh Los Angeles Lakers te hian thawhleh zing khian Western Conference final game lina an khel ang a, Nuggets in final lut chiang turin Lakers hneh nawn leh ngei an tum ang.
Inrinni zinga Eastern Conference game hnihna inkhel hmuhnawm takah Miami Heat chuan point 111-105 in Boston Celtics an hneh. Miami Heat hian series-ah 2-0 in hma an hruai tawh a, NBA finals an hnaih leh sual sauh bawk.
Nuggets in final an hnaih
