Zoremi Hmar Zote
Khawvela kan dam chhung hun rei lo tê hi hlim takin a hman theih a, hlim lo takin a hman theih bawk; eng dinhmunah pawh ding ila dinhmun inang theuh theuh-ah, harsatna leh lawmna tawng theuh theuh pawh hringnun kan hmachhawn dan a inang lo fû thei awm e.
Kan rilru puthmang hi keimahni tan chauh ni lo, kan chhungkua, kan chhehvela awmte tan pawh a pawimawh vek a, kan rilru puthmang kan lan chhuahtir dan hian thu tam tak a sawi thei a ni. Mi tha kan tih te reng reng hi rilru puthmang dik leh a tha zawnga thil thlir thin mi an ni tlangpui a, mi chhiatna lai zawng lo va, an thatna lai hmuhsak hram hram thin mi chu an hlim ngei ngei thin. Midang chunga thatna lantir thin mi chuan thatna vêk a hlawh chhuak a, mi chhiatna lai zawng ngar ngar mi chuan amah a inhrem a ni. Mi lawmnaa lawm ve thei tlat lo te, midangin chan tha an chana thîk deuh tlat thin mi hi kan tam awm a nia; hetiang mi hi chuan hlimna an tlachhamin nun nuam an hmang ngai meuh lo va, mi khawngaihthlak leh lainatawm tak an ni.
Nuih hian hriselna leh hlimna a thlen thei. Dawr emaw, sawrkar office emaw, damdawi in pawh ni se, nui sâng chunga min lo chhawn thintu chuan an hriat loh kârah midang hlimna an thlen a, dawr zui zel an châkawm a, an hmel hlim tak zûna uaiin kan pan nawn leh nge nge thin; second tlêm tê an lo nuih avang ringawt khan tu emaw tan ni tha leh hlimawm an thlen mai thin. A uar zual phei chuan nurse vawi khat sêih hi damdawi tam tak aiin a thawk chak zawk an lo ti hial a ni. Mihring kan fing tawh a, social media lam a chak tawh vang te pawh a ni ang, damdawi in leh Bank lam pawh dawr an nuam ta hlawm viau mai. Tun hma deuh kha chuan biak har tak tak, induh em em mai an tam thinzia kha mipuite chuan kan la hre furin a rinawm a, mipui vanga hna nei an nih an la hrethiam phak lo te pawh a n mahna le.
Social media lamah erawh hawihhawm leh thil, a tha lama dawnsawn kan zir a la ngai hle mai. Facebook leh youtube lamah comment chhiar hrehawm tak tak hmuh tur a tam em em mai; tu emaw natna kan thlen dawn a ni tih hai chuang miah si lova tawngkam na leh dengkhawng tak taka comment duh kan tam em em mai a, tu emaw rilru kan tihnat khan tu hlimna mah a thlen lo va, a comment-tu ngei pawhin a hlim phah chuang lo tih hi kan hriat a tul. Tu emaw kan duh dan lo deuhin a awm a, a mualpho thei ang bera post siam a, dem rawn luih luih mai te hian eng rah tha mah a chhuah lo va, a tuartu tan a na em em thung. Miin i chunga an tiha i duh tur ang bawkin mi chungah ti ve rawh tih hi chu zawm harsa kan la ti deuh ni chuan a lang. Mihring ve tho kan ni a, kan dem vak vak thinte aia ropui bik miah lo tur kan chungah a thleng thei ve vek tih hi kan hriat a tha e.
Mihring kan ni a, hlim reng chu thil theih a ni lem lo. Harsatna leh buaina hrang hrang kan tawng thin theuh a, chutih rualin a dawngsawngtu rilru puthmang azirin harsatna te pawh hi a lianin a tê mai thin. Mahni aia midang tha zawka ruat thin mi chuan a tuh rah sengin, ngainat leh rin a hlawh a, hringnuna hlu leh pawimawh ber mai hlimna a la dawng zui! Hêng mite hi mi awhawm an ni; chutih rualin tute pawh hi mi awhawm leh nun tluang, malsawm tlâk nun nei thei vek kan ni a, thil har pawh a ni lem lo. Midang chunga that chhuah a, inngaitlawm taka nun leh rilru tha pu tura mahni in-control a ni mai. Ka thu sawi hian mi natna a thlen ang em tih te, ka chhehvela chêng, awmte hian ka bula awm nuam an ti nge min tih ru tlat tih te hi ngaihtuah fo ila, famkim reng reng awm lohna khawvelah hian hlimna tal chu kan phû ve ti a, kan nun kan uluk hi a tul tak meuh a ni.
Chhânna nêmin thinur a tikiang thin tih ang deuh khan, hlim hmel pu chung leh nui sâng chunga midang kan hmachhawn hian, kan hmachhawna te kha mood fuh lo eltiang pawh lo ni se, rei tak an tûm ngai bik miah lo a nia. Nuih heh em em mai ka ni a, a theih hram chuan thinurna hi ka peh hêl hram hram thin. Rilru natna te ka tawng lo bik pawh a ni chuang lo va, ka inhnehtir duh lo mai zawk a ni. Hlim hmel put leh nuih te hi a hlut ngaihtuahin a man a tlâwm em em a, mi hausa atanga mi tê ber thlenga kan neih theih tura Siamtu thil thlawn pek a ni. Kan seih avanga tu emaw a lo hlim phah dawn phawt chuan, ui hauh lova seih mai tur. Hlimna hi kan pek chhuah tam poh leh kan seng hnem ve a ni mai a, hlim hmel leh nui hmel tih te mai mai chu ui tur kan lo ni reng reng hleinem!