April 13, Inrinni zan dar 10.15 vela Vairengte Chhim Venga chenna in kang leh hemi avanga in neitunu nunna a chan chungchangah Serlui bialtu MLA Lalrinsanga Ralte chuan chhiatna tawkte hi a hmunah tlawh nghalin chhawmdawlna awm thei ang a ngaihtuah pui nghal.
Sumtinkhawli in leh Lalherliana te in kangah hian Sumtinkhawli in hi bungrua engmah chuh hman lohin a kangral vek a. Lalherliana in erawh a kan zawh hmaa thelh mih hman a ni. In kang hi inhnaihtea awm niin, kangmei hi Sumtinkhawli in atanga intan a ni a. Kangmei chhuah chhan tak hi hriat ni lo mah se, electric kalsual vanga a kang nia rin a ni.
Kangmei chhuah lai hian in neitute hi an muhil tawh a. Sumtinkhawli tupa Lalherliana hian kangmei chhuak a hriat ve leh a pi, mit leh beng tha tawh lo chu a theih ang anga chhanchhuah tumin an in bang tlawh thla in a zuanthlak pui a. Sumtinkhawli hi damdawi in panpui a nih hnuah a thi a ni.
Kangmei chhuak hian Lalherliana in pawh manin a kang chhe deuh vek a. Kangmeiin a kan chhiat bungrua hlut zawng hi cheng nuai 5 hu vela chhut a ni.
In kang avanga chhiat tawk an awm thu a hriat ve leh bialtu MLA Lalrinsanga Ralte chuan kang tuarte hi a hmunah a tlawh nghal a. Kolasib DC leh Vairengte SDO (Civil) te bia in, kangmei chhuak avanga chhiattawhna thlenga nunna hial chan an awm avangin District Disaster Management Authority atanga ex gratia, cheng nuai 4 an dawn theihna turin hma a lak sak bakah vanduaina tawkte hi in chung tur rangva bundle 4 leh silpaulin 3 a pe a ni.
MLA chuan kangmei chhuak avanga nunna hial chan an awm chu pawi a tih thu leh chhiat tawkte a tawrhpui thu a sawi a ni.
Nunna chan awmna in kang Bialtu MLA-in tlawh nghal
