Nupa innei rei record siam
Eleanor leh Lyle Gittens te chu kum 83 innei tawhin, Guinness World Records-in khawvela nupa damlai zinga innei rei berah a puang. Eleanor leh Lyle te hi Bradenton-ah June ni 4, 1942 khan inneiin, vawiin thlengin an nupain an la dam dun a ni.
An fanu Angela Gittens chuan, “An pahnih hian hetiang a damrei hi an inring ngai bik lo a, Guinness World Record lam pawh an ngaihtuah ngai lo,” a ti.
An nupa hian an hun tam zawk chu New York City-ah an khawsa a, Lyle Gitten khawchhuahna a ni a, mahse, tunhnai deuhah Miami lama an pemin, an fanuin a enkawl phakah an insawn ta a ni. Angela chuan, “Kan hmuh leh enkawl phakah awm se kan ti a. Anmahni chuan an duh lo viau nain, an bum chhuak a ni deuh ber e,” a ti.
Eleanor leh Lyle te hian fa pathum neiin, tu pathum leh tuchhuan panga an nei tawh a, an tu leh fate lo thang lian hmu theia an dam chu damrei malsawmna pakhat nia an hriat thu an sawi a, “Kan tuchhuan ten college an zo te kan hmu pha hian min tihlim tak zet a ni,” an ti.
An inneih rei theihna chhan an zawhna chhangin Lyle chuan hmangaihna bak chu thildang sawi tur a hriat loh thuin a chang a, “Zantin martini kan lem ziah bawk,” a ti a, hei bakah hian engkimah Pathian an dah hmasa thin niin a sawi bawk.
Nupa innei rei record siam
