Nupaa awm duh vanga officer sawn tum NGO-ten hrethiam lo

Nupaa awm duh vanga officer
sawn tum NGO-ten hrethiam lo
Lunglei district bawrhsap atana dah thar Navneet Mann IAS pasal, Siaha district superintendent of police-a awm tura tih Shivam Siddharth IPS chu Lunglei district SP turin sawrkarin a sawn a, nupaa awmdun an duh vang nia sawi a ni. Hei hi Lunglei tlawmngai pawlten na takin an do nghal a, order hi sawrkarin a sut leh.
Tunhnaiah sawrkar laipui Ministry of Home Affairs chuan Mizoramah IAS leh IPS engemawzat a sawn lut a; an awmna tur hi singsak fel mek niin, an zingah hian Lunglei bawrhsap turin Navneet Mann IAS chu dah a ni a, a pasal Shivam Siddharth IPS hi Siaha SP tura tih a ni. Nupaa awmdun an duh vangin sawrkarin Lunglei SP turin Shivam Siddharth hi a ti leh a, DP&AR chuan transfer order hi November 26 khan a tichhuak.
He order thar ang chuan, Shivam Siddharth, IPS AGMUT 2020 cadre hi Lunglei SP a ni anga, amah an dahna tur Siaha-ah hian Hnahthial SP ni lai Manny Bhushan Singh, IPS AGMUT 2019 cadre chu dah a ni.
Lunglei district atanga officer sawn chungchanga lungawilohna nei sa tawh tlawmngai pawlte chu he order hian a ti lungawilo hle a. Village Defence Party Coordination Lunglei chu auchhuak hmasa ber niin, SP transfer order hi sut turin sawrkar an ngen a. SP ni lai mek chu ruihhlo do kawnga an thawhdun mek chu chhunzawm zel an duh rih tih an sawi.
Sub Hqrs YMA Lunglei leh MZP Hqrs Lunglei pawh a hran ve vea thukhawmin thuchhuah an nei a. Tunhnaia Lunglei district-a thuneitu sang sawnchhuah thlak an nih danah an lungawi lo tih an sawi.
DIG Southern Range, 2025 February-a superannuation pension-a chhuak tur chu hnamdangin a thlak a. Lunglei deputy commissioner chu thla 4 awrh a awm tih chauhah sawn a ni a; a thlak tur hian hnamdang dah a ni leh a; tunah thla 8 vel chauh awm hman Lunglei SP J Lalmuankima chu sawn a ni leh tih sawiin, Sub Hqrs YMA phei chuan DC sawn tur pawh hi sawn lo turin sawrkar an ngen a, an hlawhtling ta lo tih an sawi.
MZP Hqrs pawhin district administration leh law enforcement lam hotute thlak zung zung an ni thin chu district inenkawlna in a nghawng a, Lunglei district mipui hmakhua ngaihlohnaah an ngai tih a sawi a ni.
Lunglei DC leh SP dah thar tum chu probationary service hmang zo hlim hlawl, an posting hmasa bera nupaa awmdun kher an tum avanga midang hna thawk tha lai, Lunglei hmasawnna tur ngaihtuahtuten an tuar phah chu an hrethiam lo tih MZP hian an sawi bawk.