Zaithiam lar K Hminga leh host lar Jannis Hnamte te an innei a, mi lar ve ve innei an ni bawk a, an inneih chanchin pawh a lar. Tluang takin an innei a, hlim takin hun an hmang mek.
Zaithiam lar a nih bakah a hla phuahte vanga ngaihsan hlawh K Hminga chuan nupui nei tur khan a inngaihtuah nasa tih a sawi a, a inngaihtuah fel thlap tih pawh a sawi.
Jannis Hnamte hi hmeithai a ni a, hemi chungchang hi sawiin K Hminga chuan, “Inngaihtuah lohna chi a ni hlei nem, ka inngaihtuah nasa,” a ti.
Mahse a inngaihtuah dan hi, neih loh lam a ni lo tih a sawi a, “Ka rilru a kam a, mahse nei lo tur zawng chuan a kam miah lo,” a ti thung.
“Ka ngaihtuah nasa a, a fate hi ka bulah an tlei ang em tih ka ngaihtuah nasa a. Tin, ama tan hian phurrit ka ni zawk ang em tih ka ngaihtuah nasa. Neih loh lam ka ngaihtuah lo,” tiin hemi chungchang hi a sawi.
K Hminga hian an inngaihzawn lai khan Jannis-i vang hian hla a phuah nual a, amah chuan “pali vel a ni ang” a ti.
Mi dang vanga a lo phuah tawh thu pawh a sawi a, chung chu a nupui ni ta hian a hre vek tih sawiin, “Ka hrilh vek alawm. Mi vanga phuah ka nih thu ka hrilh a, chu chauh ni lovin ka phuah chhanate thlengin ka hrilh, hre vek se ka duh zawk a,” a ti.
Love song phuah zel a tum a, phuah zel pawh a inring. A thu hawi lam pawh a hmaa mite ang tho a nih a rin thu a sawi a, nupui neih vanga love song phuah loh a inring lo.
Nupui a neih avanga a hlim thu a sawi a, “Kawppui nei tura duan hi kan lo ni chiang khawp a, nupui neih pawh a lo nuam a, ka hlim khawp mai,” a ti.
Nupui nei tura a inngaihtuah nasat thu K Hminga’n sawi
