Nurse zirchhuakte thlah rualin zir thar turte lalut
Blessino Nursing School Maubawk Aizawl chuan Ningani khan an hnena nurse zirchhuakte thlah rualin nurse zir thar tute thu tiama lakluh an ni. Nilaini khan Nursing School Lungleiah hetiang hun hi hman a ni bawk.
Blessino Nursing School-a 6th Batch Capping & Lamp Lighting leh 3rd Batch Graduation hmanpuitu minister Prof Lalnilawma chuan nurse zir thar, zir mek leh zir chhuak hlimte chu midang tana rawngbawltu an ni tih inhria a, an mawhphurhna hlen tum turin a fuih. Nursing profession duha lutte chu eizawnna a nih rualin, mahni tan chauh ni tawh loa, midang tana nun pek tum turin a chah bawk.
Nurse zir chhuak mi 24 thlahna leh lut thar 30 lawmnaah hian Civil Hospital Aizawl Nursing superintendent Lalrinthangi Pachuau chuan zirlai tharte lukhum a khumtir (capping) bakah khawnvar chhit (lamp lighting) leh thutiam sawirual a kaihruai a ni.
Blessino Nursing School Maubawk hi kum 2019-a din niin, Mizoram Nursing Council leh Indian Nursing Council pawmpui a ni a. Kumtin zirlai 30 lak thar thin niin, GNM zir chhuak 83 an nei tawh. Tunah zirlai 88 leh thawktu 24 (zirtirtu 9 leh staff dang 15) an awm a. Parent hospital chu Aizawl Hospital & Research Centre niin, affiliated hospital atan Civil Hospital Aizawl, Zoram Medical College, Kulikawn Hospital, Mizoram Cancer Institute, Aizawl Adventist Hospital leh Greenwood Hospital an nei a ni.
Nursing School Lunglei 30th Batch Capping & Lamp Lighting leh 27th Batch Graduation hi Health & Family Welfare minister Lalrinpuii’n a hmanpui a. Zirlai tharte chu theihtawp chhuaha zir tura fuihin, zir chhuakte pawh hna thawka hmun hla zawk leh hlawk zawk, ram pawn lam thlenga pan ngam turin a fuih.
Nursing School Lunglei hi kum 1995-a din a ni a, Indian Nursing Council-in phalna a pek angin kumtin zirlai 20 lak thin an ni a, tun thlengin zirlai 506 an zir chuak tawh. Tun tumah hian zirchhuak mi 18 thlah an ni a, mi 20 lut thar lawmluh an ni.
Nurse zirchhuakte thlah rualin zir thar turte lalut
