Mizoram kohhrante inpumkhat zawka an kal tlan theihna tura hmalakna kal mekah kumin October 7 hian he inpumkhatna – Council of Churches in Mizoram chu din tan a ni dawn.
Thawhlehni khan JM Lloyd Hall Synod office-ah Mizoram Kohhrante Inpumkhatna Joint Committee an thukhawm a. Kohhran paruk – Mizoram Presbyterian Kohhran, Mizoram Baptist Kohhran, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran (Ng) aiawhte an tel.
Synod moderator Rev. R. Vanlalnghaka’n a kaihruai a, secretary report-a a lan danin, kumin May 6 khan BCM Hqrs office-ah Drafting Committee an thukhawm a, May 2-ah kohhran dang hruaitute an kawm.
An thu ngaihtuah zingah, Council of Churches in Mizoram (CCM) Constitution ruahman, CCM hawnna programme ruahman, CCM interim budget ruahman, CCM office hawn, kohhran pawl dang atanga member nih dilna te a tel.
Council of Churches in Mizoram a pian theihna tura thutkhawm hmasa ber hi 2023 January 24 khan BCM Hqrs-ah neih a ni a. He inhmuhkhawmah hian Drafting Committee din a ni. Drafting Committee ruahmanna chu 2023 May 19-ah Booth Mansion Hall, Salvation Army Hqrs-ah en ho a ni a. Drafting Committee ruahmanna chu pawmin mahni kohhran rorelna sangah ngaihtuah tura thlen leh theuh a ni. 2024 April 3-ah JM Lloyd Hall Synod office-ah thukhawm lehin, CCM danpui duang turin Drafting Committee ruat a ni.
CCM din hun atan 2024 October 27 ruat a ni a. CCM hruaitu turin chanvo insiamrem a ni tawh. Kohhran tinin office rearer tura an ruatte joint meeting hian a pawm a, kumin October 26-ah CCM Rorel Inkhawmah hei hi pawm tura chhawp chhuah a ni ang.
Council of Churches in Mizoram hruaitu:
President Rev R Lalbiakliana (BCM)
Vice presidents a) Rev B Zazawna (LIKBK)
b) Rev Lalrodinpuia LS Nghaling (IKK Bualpui Ng)
General secretary
(full time) Rev Dr Lalhmangaiha (MPC)
Joint secretary Rev T Salaw (ECM)
Treasurer Upa R Lalmalsawma (MPC)
Finance secretary Rev Jessai L Neitham (EFCI)