Congress thuneitu sang ber CWC te chu October 9-ah inhmukhawm dawnin tunlai politics dinhmun, caste census leh State panga inthlang mai tur chungchang te sawihona an nei ang.
Congress te chuan Chhattisgarh leh Rajasthan-ah thuneihna chan zui tum dawnin Madhya Pradesh-ah BJP te paihthlak tumin, Telangana ah BRS te leh Mizoram-ah MNF te paihthlak an tum dawn a ni.
Meeting-ah hian caste census chungchang sawihona neih a ni bawk ang a. Congress te chuan caste census hi neih ngei duhin leh other backward classes (OBCs) te ngaihsak chunga population mila an rights pek an duh a ni.
CWC meeting hi opposition leader tena central agencies te atanga chhuichianna nasa tak an tawh mek laia neih a ni dawn bawk a. A hnaivai ber chu AAP leader Sanjay Singh niin Delhi excise policy case chungchangah man niin Congress top leadership te chuan thlawp tur a nih leh nih loh an ngaihtuah dawn a ni.
Tuna Congress thuneitu sang ber meeting tur hma hian karthum kalta khan Congress Working Committee (CWC) chu September 16 khan Hyderabad-ah meeting neih niin khatah khan state panga inthlang tur leh 2024 Lok Sabha inthlanna neih turte atana strategy tur an ngaihtuah a ni.
Thawhtannia AICC headquarter a meeting neih turah hian tunlai politics dinhmun mai bakah Hyderabad-a CWC meeting thurel tawh bawhzuina te sawihona a ni dawn bawk a ni.
Meeting-ah hian Rajasthan leh Chhattisgarh Chief Minister te pawh an tel dawn a. Congress president Mallikarjun Kharge chuan August 20 khan CWC din tha lehin mihlui ho leh thalai zawk a chawhpawlh a, member 84 lai an awm a. National capital-a CWC meeting neih leh hmasak ber tur a ni.
CWC-ah hian regular member 39 an awm a, permanent invitees 32 awmin special invitees 13 an awm bawk a, an zingah hian hmeichhia 15 leh hmelthar an awm nual a ni.
October 9-ah CWC meeting pawimawh
