Ukraine-a Odesa lawng chawlhhmunah sumdawng lawng, Indian pali chuanna kah leh a ni a. Kyiv-a Indian Embassy chuan Pathianni khan thawktu pahnih chu an him tih an chian tawh thu leh a dang pahnih dinhmun erawh hriat theih a la ni lo tih an sawi.
Embassy-in thu a chhuahah chuan MV AGN Ragnar hi Inrinni khan Ukraine-a Black Sea lawng chawlhhmun pawimawh ber pakhat, Russia nen kum 2022 atanga an indo tan atanga beih lo ni fo tawh, Odesa-ah kah a ni tih tar lan a ni.
Indian mission chuan thil thleng chu ngun takin an thlirthlai reng tih a sawi.
Tun hnai lawkah Russian-te chetna avangin Odessa lawng chawlhnaah tho hian Indian pali an lo thi tawh a. He thil thleng avang hian Delhi chuan a ram chhunga Russian palai hlun ber kovin thil thleng a duh lohzia a hrilh nghe nghe.
A mite chuanna lawng beih a nih avang hian India chuan Black Sea-a Indian hnathawkte kaihhruaina thu a chhuah zui bawk.
“Heng lai tuipuia sumdawng lawnga che leh kal thinte dinhmun chu missile leh drone hmanga beihna avangin a derthawng hle,” a ti a. April atang khan sumdawng lawng beih a pung a, Indian panga an thi tawh tih external affairs ministry chuan a sawi a ni.
“Heng lai hmuna hna thawka chet chhuah tumte chu fimkhur taka awm tur a ni a, inring rengin, a chhawptu, hna thawh tur zawnsaktu leh lawng enkawltute atangin thu an dawnte ngai pawimawhin lawngin a zawh tur kawng, lawng chawlhna tlawh tur, venhimna dinhmun, insurance-in a huam leh rikruma mi koh mai theihna te pawh ngun taka ngaihvena chet chhuah tur a ni,” tiin Black Sea-a kal chhuak tur lawnga hna thawk Indian-te chu chah an ni.
India hi sumdawng lawnga hna thawk ngah ber ram zinga mi a ni a, ram dang lawnga thawk pawh an tam hle a. Ukraine leh Russia indona avang chauh ni lovin, tun hnaia US leh Iran indonaah pawh a lawng leh a thawkten harsatna leh chhiat an lo tawk zauh zauh tawh a ni.
Odessa-ah Indian palai awmna lawng kap leh
