Off screen hun neih tam kan mamawh
– Zodintluanga
Naupang atanga upa lam thlengin off screen hun kan neih tam a, lehkhabu chhiar tam kan mamawh hle tih MLA Zodintluanga Ralte chuan a sawi.
MZP Sub-Hqrs Lungsen-in kum 2022 – 2023 chhunga an huamchhunga HSLC pass tharte lawmpuina an buatsaih a hmanpuinaah Thorang bialtu MLA Zodintluanga chuan Covid-19 vangin kum 2020 chho atangin kan zirna kalpui dan nasa takin a danglam a. Loh theih lohna avangin ‘online’ lam hawia kan kal nasat avangin smart phone, laptop leh a kaihhnawih ‘screen’ lam kan bih nasa ta hle a. Naupang atanga upa lam thlengin ‘off-screen time’ kan insiam tam a ngai ta tih a sawi.
Screen-time insiama inkhuahkhirh chu a that rualin, zawm a har avangin tul leh mamawh takzetah lo chuan ‘screen’ kan khawih loh a tha ber tawh tih a sawi a. Naupang awmtlei na’na phone pekte avanga harsatna hi a taka Mizoramah ngei kan natna hmachhawn lian tak a ni mek, tiin a sawi.
“Kuminah pawh zirlai titha bik lehzualte pawh kan hriat angin ‘social media’ khawih tam lo, ‘screen’ hmaa hun hmang tam lo an ni a. Lehkhabu chhiar tam bawkin a ler lam zel an luah a ni,” a ti.
Congress Legislature Party leader Zodintluanga hian zirlaite chu lehkhabu chhiar tam tura fuihin, “Engtiklai mahin lehkhabu chhiar zaute hi an inchhir ngai lo,” a ti. Zirlaite phone khawih lo tura inzilh ngawt a theih loh avangin tih tur leh rilru dang lak penna tur kan dap a tul ber tih a sawi a. Lehkhabu chhiar bakah taksa sawizawina lam nasa taka uar thar a tul hle tih a sawi a ni.
MZP Sub-Hqrs Lungsen hian kum 2022-2023 chhunga Lungsen khua atanga HSLC pass 21 hnenah chawimawina thilpek an hlan a. Lungsen High School atangin mi 18-in HSLC hi pass in, midang 3 chu hmun dang atanga pass an ni.
Off screen hun neih tam kan mamawh – Zodintluanga
