Office inkalchhawk timing leh zan lam police duty

K. Hmingthankaia
Aizawla traffic jam nasat thin avanga lirtheiin oil a hmanral tam lutuk tihziaawm nana ni 21.5.2026 atanga sawrkarin office inkalchhawk hun a siam hi a fuh chiah lo deuh em? A kal hma tur ho zing dar 8:30 a kal ho leh sikul naupang kal hun inrual avang hian traffic a jam nasat phah zawk tlatin kei chuan ka hria a ni. Hmun dangah a nih ve leh ve loh chu ka hre chiah lo naa, kan naute sikul kalna lam Aizawl south lamah chuan a dikin ka hre tlat a ni. Tunhma zawng aiin he ruahmanna awm hnu hian naupang sikul kal hruai a buaithlak zawk ta tlatin a hriat a ni. Traffic police-ten an hrechiang ngeiin a rinawm a. A dik a nih chuan sawrkar hian ennawn lehin ruahmanna dang tha tak han siam leh teh se. (He ka thil sawi hi chanchinbua a lo chhuah hun meuh chuan sawrkarin a lo ti danglam leh tawh maithei bawk)
Ni 23.5.2026 zan lama tlaivar deuhthawa Aizawla traffic police an han duty thut mai kha chu a va han tha tehlul em ve le. Chhiatna rapthlak leh runthlak tak tak thlen hnua an tih chauh, Se bo hnua se kawng khar ang deuh ni mah se, an vawikhat an han tih ringawt pawh khan ni dang leh zan dang zel atan pawh a tha zawngin nghawng nasa tak a nei ngei ang tih a rinawm e. Mahse, an chhunzawm loh erawh chuan Aizawl zan lam boruak chu a ngai bawk a ni leh ang.
Sualna chitin reng, dan bawhchhiatna hrang hangte, nun sual leh nun khawlohna hun, Setana hnathawhna hun tha, Setana nuam tih hun chu zan thim hi a ni. Setana hnathawh sualna leh pawikhawihna hrang hrangte hi um bo vek emaw, dan beh vek emaw chu theih ni lo mah se, engemaw zat hi chu ven leh dan beh theih a awm ve a ni.
Sualna leh pawikhawihna hrang hrang veng tur leh ti tlem tur chuan sawrkar dik leh chak, dan bawhchhiate na taka hrem zat zat ngam neih a ngai a. Police ten ruahmanna leh chet lak dan tur fing tak an neih a ngai bawk a ni. Nimahsela, engang ruahmanna tha pawh awm mah sela, a taka bawhzuitu a mihring kha kan fin thiam leh kan taihmak a ngai em em thung a ni. Tih tak takna thinlung neih a ngai bawk a ni.
Sual zalen hun hi zan lam a nih deuh bik thin avang hian, Aizawlah hian zan lama sualna ti tur leh dan bawchhe tur mi chi hrang hrang hi engzat tak veivak thin tak ang maw.. Mi diklo Aizawla awmsa hote hi thil tiru tur leh dan bawhchhe turin zan tir lam leh zanlai, zinglam thlenga che chhuak thin an awm reng ngei anga. Chu’ngbak mi chi hrang hrang, dan lova thil tih tum leh dan bawhchhiatna lam thil rawn kenglut hi zing khawvar hma deuh leh khawvar tirh velte hian engzat tak awm zantin thin tak ang maw. Engemaw changa zan lam leh zing lam thlenga veivah a tul chang te hian rinhlelhawm tur tak tak hmuh tur an awm fo thin hi. Zan lama Aizawla veivah hi chu a nuam chiah lo thin zawng a nih hi.
Kan ram hi tun aia ram ralmuang leh ram nuam, kan ram khawpui Aizawl hi khawpui ralmauang leh nuam, mitin zalen tak leh him taka kan khawsak theihna hmuna siam tur chuan, Aizawlah hian zantin traffic police mai nilo, police dang pawh hmun hran hran, point hran hrana duty leh veivak tlaivar thak an awm thin hi thil tul tak chu a ni e. Sawrkar lamin a ti thei lo a nih pawhin, kan rama sual haw pawl leh sual do pawl talte hi zan lamahte hian tlaivar thakte hian taima takin han duty thei thin se tihte hi ka lo suangtuah ve fo thin a ni.
Khitiang thilte khi tun dinhmunah chuan a zawnga zaa thil tih theih ni hrih lo mah se, zan lama pawisak neilo, zak theilo lutuk leh mi chimawm tak takte bakah, hlauhawm tak tak leh ninawm tak taka lirthei khalh thinte tal hi chu tihziaawm an nih theih nan leh an inkiltawih ve deuh nan tal hi chuan, zantin traffic police te hi han duty tlaivar thei hram thin se ka ti hle mai. Mi ram tihdan a ni emaw, ni lo emaw, a ti hmasa ber model state kha han ni leh mai ila, min fak leh luai luaiin min entawn leh mai lo’ng maw.
Nimahsela, thil engpawh kan sawi zawng zawng thinte hi ti hlawhtling tur hi chuan, ram leh mipui tana inpekna tak tak leh tih tak takna tel lo sawrkar emaw, department emaw leh, eng pawl leh eng mihring emaw pawh tan chuan chhuanlam remchang lutuk leh tha lutuk tur chu, ‘Mihring kan indaih lo alawm’ tih hi a ni leh thin tho ang chu. Amaherawhchu, tun kan sawrkar hi chu tih tak takna nei sawrkar ni khan an lang deuh bawk a, beiseina tha tak lo nei leh phawt mai ila. Thil engemaw tak, a tha lam zawnga danglam tak kan hmu leh maithei asin.
Aw le, thil pakhat- Traffic police-te zantin in duty thei lo a nih pawhin, sawi lawk miah lovin a khat mawi tawk tal chuan han duty thei thin ula chuan, hmuh theihin Aizawl zan lam boruak hi chu a nuam lehzual ngei ang. Tin, in duty hun leh in duty dan leh a hmun pawh tidanglam fo bawk ula, dan pawisa lo hoten hun remchang an zawn phet loh nan taima tak leh thanemngai takin han duty tlaivar thei thin ula chuan, mipui chuan, ‘Kan Aizawl khawpui zan lam boruak pawh Mizoram police-te avangin tunah chuan a lo nuam leh ta hle mai’ kan ti ngei ang le.