Minister of state Robert Romawia Royte chuan Section 9(A) Representation of the People Act 1951 a bawhchhia nia hria in ZPM party chuan Thawhlehni khan larsap Dr Hari Babu Kambhampati hnenah minister atanga ban turin petition an thehlut.
ZPM party hminga petition-a hming ziahhnantu, an party Vigilance Department general secretary SL Ngursailova Sailo chuan Pu Robert Romawia hian RP Act 1951 bawhchhiain diklo takin a thuneihna hmangin hlawkna a tel (office of profit), tia thlenin, Article 192 (1) to the Constitution of India thuneihna hmanga MLA/ minister atanga disqualify turin an ngen tih larsap hnenah hian a thlen.
“Pu Robert Romawia Royte hi Northeast Consultancy Services (NECS) neitu niin, vawiin thlengin chhiah pawh GST hnuaiah return a la file a. He firm hian duhsakna uchuak tak hmangin Mizoram sawrkara District Council & Minority Affairs nen deed of agreement chu ‘single source selection’ hmangin an ziak a. NECS hi proprietorship, mimal sumdawnna a nih angin, a neitu leh hlawkna teltu chu minister Pu Robert Romawia hi a ni tih a chiang hle,” a ti.
Hei bakah hian Assembly House-ah Pu Robert Romawia’n a fapa ta anga NECS a sawi pawh, election affidavit-ah a fapa hi a hnena innghat (dependent) a ni tih a tarlang a ni, tiin, electoral roll thar berah pawh chhungkaw khat, inkhata cheng an ni tih a lang bawk tih ZPM general secretary hian a sawi a. Mizo Customary Law hnuaiah a fapa hi ‘indang’ a la nih loh avangin, a fapa ta anga a sawi pawh chu a nihna takah chuan thuneitu leh enkawltu chu minister hi a ni tih a chiang hle tih a sawi a ni.
Heng zawng zawng en hian, minister Pu Robert Romawia hian a thutiam bawhchhiain, a thuneihna hmangin sawrkar atangin hlawkna a tel tih a tilang tih a sawi a. ZPM chuan India danpui hnuaiah minister atanga ban turin an ngen tih larsap hi an ngen tih an sawi.
Office of profit vangin minister of state Robert Romawia ban turin larsap ngen
![](https://theaizawlpost.org/wp-content/uploads/2023/03/OFF-1024x683.jpg)