Mizoram sawrkarin petrol leh diesel man a tihsanin an eizawnna a nghawng avanga tihniam tura an ngenna in awmzia a neih theih loh avangin lirtheia eizawngtute chuan lungawiloh lantirnan October 14 atangin tiamchin awm loa tlan loh an tum.Oil man tihniam tura sawrkar ngen mektu NGO Coordination Committee-in an hmalakna ngaichang tura pawl hrang hrang an ngen chungchangah lirtheia eizawngtu pawl hian an tum ang hian kaltlang an tum tih an sawi.
Lirtheia eizawngtu pawl 11 intelkhawmna Mizoram Commercial Vehicle Union (MCVU) thuchhuah danin, oil man sang tihniam leh tur hian September 16 khan chief minister an hmu a, September 24-ah an hmu leh. September 17 khan Taxation minister an hmu bawk. An mi hmuhte hian Resource Mobilization Committee-ah leh cabinet-a sawi ho a nih tur thu in an thlah a; chief minister hian ‘cabinet-ah an ngaihtuah a, oil man tihniam loa a ngaia kal nise, an tih thu a sawi tak avangin an hlawhchham ta ni ah an ngai tih a sawi.
‘Oil man a san veleh khan commercial vehicle zawng zawng, eizawnna atana lirthei hmangte eizawnna a nghawng nghal a, sawrkarah rate tih san ve nghal mai a tha em, tia ngaihtuah a ni a. Amaherawh chu, sumdawng lirthei rate a san chuan, nitin mamawh ei leh bar zawng zawng a nghawng nghal dawn avangin, mipui harsatna siam tlem zawngin, lirthei fare hrang hrang tisang loa oil man tihniam tura ngen a ni zawk a, kan ngenna a hlawhtling ta lo erawh pawi kan ti a, oil man a hniam theih nan a tawp thlengin kan tang dawn,’ an ti.
Oil man sang hian nasa takin lirtheia eizawngte bakah mipuiin kan tuar mek tih MCVU hian sawiin, thlai hnah zuar thlengin an tuar tih a sawi. ‘Tunah hian hmarchhak state-ah Mizoramah oil man a sang lawr lak a. Sawrkarin projected additional revenue cheng vaibelchhe 92.84 hmuh a tum avanga mipui min sawrfu hi kan hrethiam thei loa, Mizoram mamawh buhfai leh chakkhai phurte pawhin chawi belh chuan kan tlan thei tawh loa, kan din mai a ngai ta hi mipui hriatthiamna kan ngen a ni,’ a ti.
Zoram pumah kawng a chhe em em vek a, kawng laiah lirthei a tlu ngut zel a, an lirthei part hrang hrang a chhe nasa a, kawng chhiat avanga an lirtheiin a tawrh mek laiin, oil man a lo sang chu lirtheia eizawngtute tan chuan, oil man tal a hniam loh chuan hlohin an tlan thei ta lo tih MCVU hian a sawi a. Sawrkarin an dilna a tihhlawhtlin sak theih loh avangin lirthei number plate eng (yellow) zawng zawng chu tlan loa ding vek turin an inngen tih a sawi.
MCVU member ni lote pawh kan tan vek a ni tih hria a, an hmalakna thlawp theuh tura ngen an ni tih sawiin, thuawih lo kawhmawh bawl an awm a, harsatna an chungah a thleng a nih pawhin MCVU-in mawh a phur dawn lo tih a sawi.
October 14 zing dar 6.00 atangin tiamchin awm loa din an tum a, district tinah duty indah vek a ni dawn tih an sawi a ni.
The Aizawl Post thudawn danin NGO Coordination Committee hruaitute chuan oil man tih san chungchangah hian Thawhlehni khan chief minister Lalduhoma an hmu a, oil man tih san chu sawrkarin ennawn leh turin an ngen. Oil man tih san chu mipuiin an pawmtlang lo deuh nia an hriat thu leh hemi chungchangah hian sawrkarin ennawn se an duh tih an thlen.
Chief minister hian oil man tihsan chungchang chu cabinet thuthlukna a nih avangin, ennawn a nih dawn a nih pawhin cabinet vekin a ennawn a, thutlukna a siam leh tur a ni tih a sawi a. Cabinet an thutkhawm thuai a beisei tih sawiin, NGOCC hruaitute chu cabinet thuchhuak ngaichang turin a lo ngen a ni.
Oil man tihhniam phuta lirthei tlan loh tumten an tum la sut lo
