Mizoram sawrkarin oil man a tihhniam dawn tak loh avangin lirtheia eizawngtu pawl intelkhawm chuan lungawi loh lantirna atan tunkar Nilaini, October 23 atang hian tiamchin awm loa tlan loh an tum tih an sawi.
Mizoram Commercial Vehicle Union (MCVU) Gen. Hqrs. thuchhuak chuan oil man a san avanga mipui tawrhna tur pumpelh theihna atan Mizoram sawrkarah oil man tihniam tura a dilna chu cabinet thukhawmin rem a tih loh avangin October 14-a lungawilohna lantir a tum a, NGO Coordination Committee nen an inkawmnaah a. NGOCC chairman chuan October 8-a chief minister-in oil man Rs.3 a titlawm tura ngaihtuah leh a ngaih thu leh, cabinet thurel a nih avanga cabinet thukhawm bawkin ngaihtuah tura thutkhawm koh thuai a nih tur thu te, chumi chhung chuan oil man tih sanna hi hman rih loh ‘kept in abeyance’ a dah tur thu a lo hrilh chu pawm ve turin an ngen tih a sawi.
MCVU-in petrol leh diesel man Rs. 5 ve vea tihniam tura an dil chu NGOCC hian, Rs.3 ve vea tihniam tura an dil thu leh, 2024 September 1 atanga oil man to tura tihna order sut leh na chhuah tura chief minister hnena an sawi chu pawm ve turin an ngen a. MCVU chuan NGOCC ngenna chu zahawm tiin an pawm ta tih a sawi a ni.
October 11-ah chief minister an hmuhnaah pawh oil man sangah order sutna a tihchhuah tawh thu leh October 16-ah cabinet thutkhawm a koh bakah oil man an tih tlem ngei a beisei thu a lo hrilh a, lungawi lohna lantir tum chu thulh a, ni reilotea cabinet thutkhawm awm tur chu nghak hram tura a ngen angin, zah takin an pawm tih a sawi bawk.
Chief minister-in a thuphunga NGOCC leh MCVU a tiam tawh, oil man tihhniam tum a nih tur thu a lo hrilh chu cabinet thukhawmin a ngaia kaltlang leh tihhniam loh an rel tak avangin, MCVU chuan Zoram puma commercial vehicle zawng zawng 2024 October 23 (Nilaini) zing dar 6.00 atangin tiamchin awm loa din nise, tiin an rel tih a sawi a ni.
‘Mizoram pumah kawng a chhiat em avangin khaw tam takah maxi cab a service mumal thei lo a, ei leh bar nitin mamawh phuhrutu truck-te kawng laiah an tlu in an chhe nasa a, Mizoram PWD kawng chan bik chu Mizoram sawrkarin an siamthat thuai kan phut a, company hrang hrangin an siamte siamtha thuai tura kan ngenna chuan awmzia a nei tawh lo a ni,’ tiin, lungawi lohna lantir an tum chhan MCVU hian a sawi a. Mipui tana lungawilohna lantir tur an ni tih hria a, thlawp turin an ngen tih a sawi.
Oil man tihhniam tak loh vangin October 23 atang din tum nawn
