Agriculture department buatsaihin Ningani khan Aizawlah ‘Mega Oil Palm Plantation Drive- 2023’ hman a ni a. Oil palm ching hlawhtling thlanchhuahte hnenah “Best Farmers Award 2023” sem a ni.
He hun hmanpuitu Agriculture minister C Lalrinsanga chuan sawrkar laipui ruahman anga Mega Oil Palm Plantation Drive hi Mizoram district tinah hman tan a ni tih a sawi a. Oil palm chingtute an hlawhtling chho zel chu lawmawm a tih thu sawiin, beiseina sang tak a neihtir tih a sawi a ni. Oil palm chingtute chu an tharchhuah a tam zawk theihna’n plantation area zauh zel bakah kung khatah a tam thei ang ber tharchhuah a nih theihna’n plantation tihna tur hmun thlang fimkhur a, enkawl uluk turin a chah a ni.
Mizoram State Planning Board vice chairman H Rammawi chuan sawrkar laipuiah hmalakna tur dila project siam chungchangah fimkhur leh uluk a pawimawh a, mithiam rawn tam a pawimawh tih a sawi. Godrej Agrovet Ltd. leh Patanjali Foods Ltd. aiawhten Mizorama oil palm chingtute nen an thawhhona leh hmalak zelna tur, harsatna an tawh thenkhat leh hamthatna siambelh theih turte an sawi bawk.
Oil palm ching hlawhtling mi pathum – Ramtinchawma, Nalzawl Mamit district; Lallawmzuala, Serchhip leh F Lalhlimpuii, Bairabi, Kolasib district ten oil palm chin kawnga an tawnhriat an sawi a ni.
India-in ram dang atanga hriak ei chi (edible oil) a lakluh tihtlem na’n oil palm chin kawngah hma a la a. Scheme thar, “National Mission on Edible Oils – Oil Palm (NMEO-OP)” ah cheng vaibelchhe 11040 hman tura ruahmanin, Mizoramah pawh kum 2022 atangin he scheme hmang hian hma lak a ni.
Mizorama oil palm chin leh sawngbawlna atan 2004 December 2 khan ‘The Mizoram Oil Palm (Regulation & Processing) Act’ pawm a ni a, he Act hmang hian kumtina tlangram lo neih tih tlem leh hriak hmanga intodelh a nih theihna’n hma lak a ni. Loneitute leh oil palm atana thawhpui – Godrej Agrovet Pvt. Ltd. leh Ruchi Soya Industries Ltd. (Patanjali Foods Ltd. tia thlak) te nen thawk hoin, hlawhtlinna hmuh chhoh mek a ni.
District hrang hranga “Best Farmers Award 2023” dawngtute:
# Mamit District : Ramtinchawma, Nalzawl. Hectare (Ha) 31.89 a zau ramah kung 4560 neiin, kum 2022- 2023 chhung khan quintal 4071.85 a hralhchhuak.
# Aizawl District : C Vanlalthlamuana, Armed Veng. Ha 4.265 a zauah kung 610 neiin, kum 2022- 2023 chhung khan quintal 153.53 a hralhchhuak.
# Serchhip District : Lalremruata Royte, Serchhip Darnam Veng. Ha 3.56 a zauah kung 509 neiin, 2022- 2023 chhung khan quintal 75.47 a hralhchhuak.
# Kolasib District : Zomuansanga Ralte, Khamrang. Ha 23 a zauah kung 3293 neiin, kum 2022- 2023 chhung khan quintal 1774.40 a hralhchhuak.
# Lunglei District : Lalrinthanga, Khawmawi. Ha 3.85 a zauah kung 550 neiin, kum 2022- 2023 chhung khan quintal 379.59 a hralhchhuak.
# Lawngtlai District : Tarit Kanti Chakma, Chawngte ‘C’. Ha 2.50 a zauah kung 370 neiin, kum 2022- 2023 chhung khan quintal 307.00 a hralhchhuak.