Oil Palm Growers Association-in an oil palm chin atanga sawrkar laipuia tanpuina an dilna turah chief minister Pu Lalduhoma DO letter ziahsak tura an ngenna chu a ziahsak duh loh avangin larsap an pun hnu ah an hmu thei ta chauh niin BJP Mizoram chuan an sawi.
BJP Mizoram State thuchhuak chuan, Oil Palm Growers Association Kolasib District leh Mamit District ten chief minister an ngenna a hlawhtlin loh hnu hian larsap (kalchhuak ta) Dr Hari Babu Kambhampati hnenah an harsatna thlenin a puihna an dil a, larsap hian 2024 December 12 khan Union Agricultue minister Shivraj Singh Chauhan hnenah an thil dil hi a rang thei ang bera tih sak tura a ngen hnu ah sawrkar laipui hian a rawn tihsak ta niin a sawi.
Central scheme NMEOOP hnuai atanga kum 2022-2023 a Viability Gap Payment (VGP) support price cheng vaibelchhe 2.2 an hmu leh, kum 2023- 2024 atana nuai 76 an hmuh bakah thlatin sawrkar laipuiin Oil Palm Growers Association puihna tur a ruahman sak chu BJP Mizoram chuan a lawmpui a. Sawrkar laipuiin kuthnathawktute a ngaihpawimawh zia a langchiang tih a sawi a ni.
‘Mizoram sawrkar Pu Lalduhoma kaihhruai hian inthlan hmaa kuthnathawktute tana an thutiam chu tipuitling thei leh loa an awm ta mai hi a mak a. Sawrkarna an chelh hmaa an thusawi, kuthnathawktuten an nghahhleh em em – thlai thar an lei dan tur an pehhel kual leh hi a pawi a. Mizo Kristiante thudik tawk lo hrilh hi bansan tur leh Bible-in min hrilh anga mahni nihna anga langchhuak ngam a, thudik chauh sawi thin tawh turin Mizorama sawrkarna chelhtute kan ngen a ni,’ thuchhuah hian a ti.
Oil palm chingtute ngenna CM-in a tih sak duh lo – BJP Mizoram
