Pathianni zing khan khelmual ropui Wembley Stadium in palian huanga inhnek ropui a thleng a, mipui 90000 zet pungkhawm hmaah Oleksandr Usyk chuan Daniel Dubois a knockout. Knockout a Dubois hneh nawn lehtu Usyk hian palian huanga kawnghren pali a kawl khawm nawn leh.
Palian huanga kawnghren pali inchuhna inhnek ngaihven hlawh takah hian WBA (Super), WBO leh WBC kawnghren kawl khawm mektu Oleksandr Usyk-a’n IBF kawnghren kawl mektu Daniel Dubois hneh nawn leh ngei tumin tan a khawh a. British boxer Dubois hian a tlawm tawhna chhangletin, Usyk hneh let ngei a tum ve hle bawk. Kawnghren pali meuh inchuhna, inhnek pawimawh zet mai hi hmuhnawm takin an tan.
Round tir lamah kum lama naupang zawk Dubois an beiseiawm takin bul a tan a, a khingpui a nawr na nghal hle. A khingpuiin nawr na viau mah se Usyk a buai lova, chiai hek lo. Fim leh dawhthei takin a inlan a, fuh zet zetin a lo chhang let thin. Inhnek thiam zawk leh che rang zawk a nih miau vangin Usyk dinhmun a tha telh telh a, hnek chhuak tam zawk a ni a, hnek fuh tam zawk a ni tel bawk.
Hmuhnawm taka round li an inhnek zawh hnuin round nganaah thil a danglam ta vek a, inhnek a tawp zui ta hial bawk. Round ngana tir lamah Usyk-a’n fuh zetin a hnek fuh a, mipui thawm a tha hle. Usyk kut thlak na tak a tawrh hnuin Dubois a insiamtha a, chiang zeta hnek fuh hnuin round kilhah dan beh tumin a khingpui a nawr zui chiam bawk. A khingpui hnek tluk a tum luatah a chesual a, amah a tlu ta zawk. Zam hauh lo leh fim taka inlan Usyk hi a lo insiam rem zeuh a, chiang zet zeta hnek fuh nawnin a khingpui a hnek tlu. Dubois hi tho chhuak leh mah se Usyk an a hnek tlu nawn leh zat a. A tluk vawi hnihnaah thochhuak tur a awm ta lova, Usyk lakah tlawmin kawnghren pali kawl khawm a tumna a puitlin zo lova, a kawnghren kawl mek IBF a ch^n zui ta a ni.
Tyson Fury a hneh hnuin Oleksandr Usyk hi palin huanga kawnghren pali kawl khawm thei hmasa ber a ni a. IBF belt chuhpui tura ruat aia Fury hmachhawn nawn leh a thlan vagin IBF belt chhuhsak a ni. Usyk kalsan IBF kawnghren hi Anthony Joshua nen an inchuh a, knockout a chakin world champion a ni. A kalsan tak kawnghren hi Dubois hnen atangin a laksak leh ta a, a tum hnihna atan palian huanga kawnghren pali a kawl khawm.
Professional huangah in hnek vawi 24 hmachhawn a la chak vek Usyk hian British boxer larte a ngam hle. World champion ni thei thiau; Tyson Fury, Anthony Joshua leh Daniel Dubois te vawi hnih theuh hmachhawnin a hneh vek a, an kawnghren kawl lai a chhuahsak vek bawk.
Kum 38 mi lai ni tawh Usyk hian boxing a khel rei tawh lo mai thei. Dubois a hmachhawn hma hian a chawlh hmain kawnghren pali kawl khawm leh zet a tum thu a sawi a, a tum a puitlin leh der tawh. Boxing a chawlhsan zui lo a nih pawhin inhnek vawi hnih vel bak a hmachhawn a rinawm tawh lo. Tunge Usyk hmaa ding leh ang tih chu zawhna awm nghal a ni a, Tyson Fury, Anthony Joshua leh Joseph Parker te chu rinkai zual te an ni. Usyk hian tunge a hmachhawn leh dawn tih tihchian hmain a nupui fanaute kiangah chawlh hman hmasak zet a tum tu a sawi.
