Olivia Rodrigo hla thar ‘Vampire’ chu kar khat chhunga khawvel huapa hla lar ber niin, Billboard Global 200 chart-ah a No.1 a, he chart-a kar hnih a No.1-na a ni ta. Hetihrual hian NewJeans pawh a vawi thum nan chart top 10-ah an lang a, Taylor Swift album thar ‘Speak Now (Taylor’s Version)’ atangin chart top 10-a lang thei hla pahnih a awm a, Gunna pawh top 10-ah a rawn lang ve leh ta bawk.
Billboard Global 200 chart hi khawvel huapa kar khat chhunga hla lar dan tehna niin, chart ranking siam nan hian ram hrang hrang 200 chuanga official-only stream (subscription leh ad-supported audio leh video music services) leh download sales te chu tehna pawimawh a ni.
Olivia Rodrigo ‘Vampire’ hian a kar hnihnaah stream maktaduai 58.7 leh download sales 7,000 a la nei theia, hei hi chart-ah a No.1 pui leh ta a ni.
NewJeans ‘Super Shy’-in stream maktaduai 63 leh download sales 6,000 neiin, No.2-ah a debut. NewJeans hi South Korean girl group niin, member panga- Minji, Hanni, Danielle, Haerin leh Hyein te an ni a, 2022-ah an debut a, an single hmasa ber ‘Attention’ an tihchhuah atangin ngaihven an hlawh nghal. Kumin January khan an single album hmasa ber ‘OMG’ an tichhuak a, hei hian khawvel hriatah a phochhuak ta a ni a, an hla dang ‘Ditto’ chu Billboard Hot 100 leh UK Singles Chart-ah lanpui thei, Billboard Global chart-ah pawh January thla khan No.8 leh No.10 an lo kaipui ve zak zak tawh a ni.
Myke Towers ‘LaLa’ chu stream maktaduai 77.4 tlingin chart No.26 atangin No.3-ah a invawrh a, he chart top 10-a a lan vawi khatna a ni.
Tunkar Billboard Global 200 chart top 10-ah Taylor Swift hla pathum a lang thei a, a album thar ‘Speak Now (Taylor’s Version)’ atangin ‘I Can See You (Taylor’s Version) (From the Vault)’ chuan stream maktaduai 52.9 leh download sales 6,000 neiin, No.4-ah a debut a, ‘Back to December (Taylor’s Version)’-in stream maktaduai 38.6 leh download sales 3,000 neiin No.10 a kai bawk. Hei bakah hian a hla dang ‘Cruel Summer’ chu No.3 atangin No.5-ah a tawlh ta bawk a ni.
Taylor Swift hian he chart top 10-a lang thei hla 17 a nei tling ta a, hmeichhe zaithiam zingah he chart top 10-a lang thei hla ngah ber niin, a nawlpuiah pawh top 10-a hla 28 nei thei Drake chiah a pha lo. Hetihrual hian Billboard Global 200 chart hi September 2020 atanga an tih tan chauh a ni.
Gunna ‘Fukumean’ pawhin stream maktaduai 40.8 leh download sales 1,000 neiin, No.12 atangin No.8-ah a invawrh a, he rapper hian he chart top 10-a lang thei hla pathum a nei tling ta a ni.
Olivia Rodrigo ‘Vampire’ a lar ber
