R.Lalfakawma
Seling
Kum 2001 a tih chhuah Hindi film hlawhtling tak mai ‘Nayak’ (One Day CM) kha kan en hlawmin ka ring a. A changtupa Shivaji Rao kha Telivision lama mi kâwm thin niin an state Chief Minister Balraj Chauhan-a kâwmin a rorêlna hnuaia sawrkhâr hlawhchhamna kawng hrang hrangte kha a sawipui chiam mai a. An CM lah khan thil tih mai a harsat dan leh a kotlâng atanga en ang ngawt a nih loh thute sawiin amah ngei chuan ni khat chhung Chief Minister ni ve se, thil awm dan a hre thiam ve mai ang tiin a hmai phih faina ni pah fawmin One Day CM a nihtir ta a. Ni khat chauh CM tur tih takah siam that tur leh hmalâkna tur a ngah êm êm mai a. Eirûkna leh hlemhlêtna tireh tura a hmalaknate kha thaw dêp dêpin kan thlîr a; kan ram dinhmun nen khaikhinin amah ang tak Chief Minister mamawh riauva inhriatna pawh kan nei lian hle a ni.
One Day CM pawh kha dikna duhtu, hlemhlêtna thil rêng rêng a zung nen lama kar phawn vek tumin bazaar hmun thlengin a luh chilh a. A lian ber atanga a tê ber thlengin siam that ngai lai chu tihkhawtlai (pending) awm lovin a vai hma miah miah mai a. Thil tha leh dik taka a’n tih takah chuan a hmaa Chief Minister mawng a hlim ta char char mai a nih kha le.
“Ka mit hmuh leh benga ka hriatte hian, sualah min hruai lut” tih hlate hi tui takin sa thin mah ila, kan thil hmuh leh hriatte hian kawng dik min zawhtir chang a awm fo va. Kha film ngei mai pawh khan kan politics thlir dan a her danglam nasa ngei ang chu. Thâwkkhat lai khan Sangzela Tlau-in khawchhak ram changkâng zâwk leh Europe lam thlenga a zin vahna Cable TV leh You Tube kal tlangin min hlui thin a. Kan Zo tlâng ram nuam aia ram nuam zawk ni awm tak tak, fai si, tha si han hmuh khan rualawhna lian tak min neihtir a. Thingtlâng kilkhawr zâwkah pawh fai ngainatna chi min tuh a, mahni khaw phâk tawk tawkah tan pawh kan la tlangin a hriat. Kan sawrkhâr hotute pawhin khang thilte kha lo en vein kan rama tih ve theih ang tur chi an lo ngaihtuah ve rauh rauh turah kan ngai thin a. Rin leh beisei ang ngeiin skywalk, ropeway lamah bul tan ve kan han tum a, vanduaithlak takin a hlamzuih leh ta hlauh mai a; a pamhmaiin khawi laiah tak khan nge a kal dik loh ni dawn ni.
Tu emaw kan fak ruala tute emaw sawisel pah kher hi thil tûl lo tak, a tuartu tana ngeiawm duh deuh mai a ni a. Mahse, a châng chuan thil tha han tiha tute emaw hêk anga lang tlat hi a awm ve hrim hrim a ni. Eirûkna leh hlemhlêtna do kawngah te, kawngpui chhiat leh that, inrenchemna leh hmasâwnna hna thawh hrim hrimah te pawh hian a ni vek ang chu. Chutih rualin sawrkhâr hmasa lam aia tha lo leh duhawm lo zawk thil a awm a nih pawhin a hmai bâl zawk chu a lang fiah tho tho; tute emaw thil tha tih khan tute emaw tih ve loh kha a hêk ve hrim hrim thin a ni.
One Day CM film-a Shivaji Rao hnathawh that leh fak tlâk a nihzia kha kan hmu mawlh mawlh a. Ni khat chauh CM tur a nih avângin mawng hung hman lêk lova chein hna pawh a thawk zar zar hle. Sawrkhâr hnathawk rinawm lo a bân/suspend nghal a; sumdâwng rinawm lote chhui chhuakin permit a tihtawpsak a; sawrkhâr damdawi ina thawk doctor-te pawh anmahni clinic ngaipawimawh zawkte chu a ban nghal bawk a. Police hna thawk tha lote pawh zahngaihna nei lovin a ban hmiah hmiah mai a ni. Ni khat chhunga a thawh hi ropui tak a ni a, a chhunzawmna pawh tha tak a ni; amaherawhchu, thlan tlin a’n nih takah chuan vervek taka thil ti zuiin a khingpuipa nunna hialin a tawrh phah ta thung a nih kha.
One Day CM part II hi awm ta se eng nge a an zel ang aw tih zawhna hi rilruah a awm reng mai. Duhthusam chu duhthusam nise la, a tak tak thil erawh duhthusam ang ngawt a ni thin lo. Ni khatnaa a bân, suspend, transfer-ho khan hriatthiamna, ngaihhnathiam an tulzia thiam takin an rawn thlen ang a. |henkhat lah a chipui, lamhnai tak tak, pi leh pute atanga chhiat that tawh chânga lo inphiar zawm tlat tawhte khan an han tahawh leh ang a. A lamhnai kher lote pawh an party tana theihtawp chhuahtu te, thenawm khawvêng leh college kalpui thinte nen lam khan ngamtlak takin an rawn bêlbul ve ang a, a buaithlak duh ngawt ang. A hma nia transfer/suspend order fel fai taka typewriter-a an chhut fel vek tawhte pawh kha siam that leh ngai a tam duh hle ang chu. Bul tan tha viau mah se a sawhkhawk khan a rawn vawm zui ve nawk nawk tawh dawn a, lu haina tur chu a ngah ve hle ang.
Kan chan sân deuh laiin ‘Kan khawsaknate chu vânah a ni si a’ ti thin mah ila mihringte hi leia cheng kan la nih miau avângin chak lohna leh thlêmna phuar vel, tisaa nung kan la nih avângin kan rilru leh ngaihtuahna thleng mai hian a tisa fo thin a. Isua zuitu zinga hruanghrau na ber leh a tana thih hial pawh ngam ve Petera-te ngei pawh khan an zui Isua khenbeh a nih meuh chuan Chanchin tha kha hril zel tang e an ti lo va, an hna ngai chhunzawm turin Galilee dil lamah lên an lo dêng leh hmanhmawh a nih kha. Chhiahkhawntu Zakaia’n Isua a mikhual tum khan a sum zahve pachhiate hnêna a pek tur thu leh mi thil dik lo taka a lo laksak a nih chuan a leh lia a rulh zel tur thu a sawi kha kan hria a; Zakaia nun chhunzawm zel te pawh kha hriat ve a chakawm khawp mai.
Keini 60’s & 70’s chhova piangte hi gospel camping lut ngun pawl tak kan nih ka ring a. Kum tin Masi dawn hnaihah camping kan nei deuh ziah mai a. Amah Evan. Tluangtea tih dan takah chhungkaw chhehchhawl, camping-a lut chi kha kan awm ve hrim hrim a. Tin, ruihhlo ngai leh zu ngawlveite kha camp lut tur list zinga langsar tak an ni thin bawk. Zu ngawlvei leh ruihhlo ngai te, nu valai leh pa valai te, nula tlangval te, sual lam la hmêl hriat loh tleirawl nun duhawm takte pawh kha an nun khalh ngil nan tiin kan camp-ho dul dul a. Kan mamawh inang lo hlawm teh mah se Pathian thu chuan thil a tithei a ni ang, chawlhkâr khat kan camp chuan kan lam chhuak suau suau tawh mai thin a ni. Camp chhuah hlimin kohhran/chhungkuate pawh han hlim viau thin mah ila, a kum leh a lo thlen chuan camping mamawh êm êm mai khan kan lo awm leh hman tawh thin a; tum anga awm leh daih rei hi a har a lo ni.
Engpawh nise, mi tin mai hian thil tha tih a, thangthat hlawhte pawh kan duh êm êm vek ang. Mahse, thil tih awlsam a nih loh chuan chaw sain min kâng dâi leh mai a, a nih loh leh a turtuin a zir loh emaw, ruahman leh zêldin anga thil a lo tih mai theih loh hian insiamrem thiam a har fo thin. Inkhel ente pawh hian a kotlâng atang chuan tih dan tur hrilh a har lo, a chhunga luh erawh chuan duh ang ngawtin a chêt zung zung theih loh thin hi a lo nia. Petera leh Zakaia-te hma daih khan Thuhriltu chuan thu tui tam vak pawh thu â tak tak phuh chhuahna mai a ni a lo tihte pawh kha a dik thui khawp awm e.