India rama a ruala Lok Sabha leh Rajya Sabha inthlan ‘One nation, One Election’ tia sawi leh aupui chu tun sorkar mek narendra Modi kaihhruai lai ngei hian political party hrang hrangte thlawpna hmuh beiseiin National Democratic Alliance (NDA) sorkar chuan kalpui ngei a tum dawn tia sawi a ni a. Kum 2011 atanga neih tawh loh census exercise pawh neih thuai a ni dawn bawk.
A ruala inthlan huaihawt (simulteneous election) chungchang hi kum 2014 daih tawh khan Prime Minister Narendra Modi-an thlantlin a nih hnu lawka a sawi lan niin president hlui Ram Nath Kovind kaihhruai committee pawh din a ni a.
Kovind committee chuan Parliament leh State Assembly te a ruala inthlan leh ni 100 chhunga local body election in zui se an ti. Modi chuan a sorkar chuan Independence Day puala Red Fort atanga thusawina a neihah pawh aruala inthlan kalpui chu an tum a nih thu a sawi nawn leh ngat a ni.
Kum sawm dan zela neih thin Census kum 2011 atanga neih tawh loh chungchangah ‘inbuatsaihna kalpui mek a ni a, neih a ni thuai ang’ tia sawi a ni bawk a.
Jammu and Kashmir Assembly election chungchang kaihhnawihah officials te chuan dan pawna hnawl Jamaat-e-Islamic te inthlana an chuh ve an remtih loh chungchangah Jamaat-e-islami te chuan independent canddiate tam tak thlawpin inthlana chuh ve theih loh chu tihtawpsak turin an ngen thu an sawi bawk a.
“Jamaat-e-Islamic te hi an chetdan avanga dan pawna hnawl niin enfiah leh tur an ni” tiin thuneitute chuan an sawi.
Modi 3.0 sorkar chuan a ni 100 hmel a hmu ta a, kum 2014 a agenda an neih tawh te chu tihhlawhtlin zui zel an la tum a. Modi chuan kum 2014 a thlan tlin an nihna chhan te chu tunah pawh coalition sorkar angin kal mahse an thawhpuite hmina tihhlawhtlin vek a tum tia sawi ani bawk a. “NDA sorkar mek chu a chak tawk a, term a hmang zo ang,” tiin sawi a ni bawk.
Government ministries hrang hrangte chuan Modi sorkar term thumna hlawhtlinna pholan an tum rualin chu ai mah chuan tun hnai kum 10 chhunga Modi sorkar hlawhtlinna te pholan nasata aupui zui zel an tum zawk tia sawi a ni bawk.
Modi sorkarin a hlawhtlinna nia a sawia a chhuan ber ber te chu Rs 3 lakh crore infrastructure siam nana hman te, Goods and Services Tax regime te bakah New Education Policy (NEP) te chu a ni.
Congress-in sawisel
Congress leader P. Chidambaram chuan Centre a BJP kaihhruai NDA sorkar chu ‘one nation, one election’ chungchangah sawiselin Constitution hnuaiah kalpui ngaihna awm lo leh kalpui tur chuan Constitutional amendment panga tal siam a ngai dawn a ti.
Prime Minister Narendra Modi chuan Lok Sabha emaw Rajya Sabha ah pawh ni se constitutional amendment siam turin number a nei ngah tawk lo a ti hmal bawk a.
Chidambaram chaun, “One nation, one election hi kan Constitution hman mek hnuaiah kalpui ngaihna awm lo va, kalpui tur chuan constitutional amendment panga tal siam a ngai dawn” tiin a sawi.
“One nation, one election hi kalpui theih a ni lo. INDIA bloc chuan a dodal bur” tiin a sawi bawk a. Tun hnaia PM Modi an Congress te chuan reservation tihtawp an duh tia a sawi chungchangah Chidambaram chuan, “Eng vangin nge reservation tihtawp kan duh ngawt ang” a ti zui bawk a.
“Keimahni zawk a nia reservation ceiling 50 percent nuaibo ngai tia au zawk ni. Keimahni zawk a nia caste census ngiat zawk ni. Keini chuan reservation chu population milin kalpui kan ngiat zawk a, prime minister thusawi hi awih thin suh u” tiin a sawi bawk.