‘One nation one election’ kalpui
tumnaah ECI-in tan lakpui ngen
Election Commission of India hotute chuan ‘one nation one election’ kalpui turin a inbuatsaih mup mup a, Mizoram Election department pawhin theihtawpa tan lakpui turin an sawm tih an sawi.
Mizoram chief electoral officer (CEO) thar Dr Lalrozama chuan CEO Mizoram kalchhuak ta, tuna Election Commission of India-a deputy election commissioner ni mek Madhup Vyas leh ECI mi pawimawh dangte chu Ningani khan New Delhi-ah a kawm a; joint CEO Ethel Rothangpuii’n a tawiawm.
ECI hotute chuan Mizoram People’s Forum-in inthlan thianghlim a awm theihnana hma an lakna tha an tih thu sawiin, state ralmuang a nih anga state dangte entawntlak khawpa inthlan felfai neih a nih thin avangin Mizo mipui chungah lawmthu an sawi a ni.
ECI chu ‘one nation one election’ kalpui turin a inbuatsaih tih sawiin, CEO leh Election department-a thawktute chu he hmalakna a hlawhtlin theihnan theihtawpa tan lakpui turin an sawm.
CEO chuan Mizorama Election department-in harsatna a neih leh hmasawn ngaihna lai a thlen zingah, inthlan hmanrua – EVM dahna warehouse chu district hrang hrangah thawmthat a ngai tih sawiin, ECI duh dan anga heng warehouse himna atan venghimtu tam zawk dah belh turin Police department ngen an ni tih a sawi bawk.
Thawktu indaihlohna sukiang tura hmachhawp a sawipui bakah an department-in building hran a neih loh avanga harsatna thlenin, inthlan laia venhimna thlengin a nghawng tih Dr Lalrozama hian a sawi.
Mizoramah media kan la neih changtlun tawk loh avangin ECI hmalakna puanzar kawngah harsatna a awm thin tih a sawi bawk.
Inkawmnaah hian Parliament Secretariat-a hotute pawh telin, kumina Rajya Sabha inthlan tur thlirlawk a ni a, inthlan felfai a awm theihnan thawhpui turin CEO leh Election department an sawm a ni.
‘One nation one election’ kalpui tumnaah ECI-in tan lakpui ngen
