Congress-in Adani-te thamna pek dan
Parliamentary Committee chhui phut
Adani leh a thawhpuiten thamna an leklam dan leh hemi chhuichhuah hleihtheih loha awm reng chu Joint Parliamentary Committee-in a chhuichian an phut tih Congress party chuan an sawi.
MPCC treasurer Dr Lalmalsawma chuan Gautam Adani leh a thawhpui pasarihten thamna sum tam tak pea solar power contract man to tak a hmuhnaah, Prime minister leh Adani hian inzawmna thuk tak an nei tih Comgress party-in a aupui reng lai leh, India sawrkar hnuaia awm Securities and Exchange Board of India (SEBI), Enforcement Directorate (ED), Central Bureau of Investigation (CBI) leh Income Tax Department ten Adani hi rintlak taka puhna awm chung pawhin an chhui zo duh lo mai niloin, thuneitu sang zawkte thupek avanga chhuichiang mumal lohin tihtawp a ni tih a sawi.
An chhui tha duhlo mai a ni loa, heng agency hi Prime minister hriatpuina in Adani tan airport, port, media company leh cement plant lei a lo awlsamna turin hmansual a ni ta zawk a. Chutiang chiah chuan ED leh CBI chu hmanruaah hmangin eptu politician-te beihnan, eptu party-te tihchhiatnan, eptu chief minister-te lung ina khungnan an hmang tih a sawi bawk.
Hetiang hi a nih laiin, SEBI tlukpui, United States-a Securities Exchange Commission (SEC) chuan kum 2020 leh 2024 inkar khan Adani leh a thurualpuite hian lndia sawrkar official-te hnenah hlawkna maktaduai 16000 chuang contract an hmuh theihnan thamna an pe nia sawiin, heng contract hi Andhra Pradesh, Chhattisgarh, Jammu & Kashmir, Odisha leh Tamil Nadu-ah a kalpui a nih thu an sawi tih Dr Lalmalsawma hian a sawi a. Adani leh a thawhpuite chet dan hi US dan bawhchhiatna, a bikin Foreign Corrupt Practices Act (FCPA) leh federal securities dan bawhchhiatna a nih vanga hetianga rawn che ta an ni tih a sawi a ni.
Congress party chuan heng thamna thubuai lian tak tak, finfiahna rintlak nei nia sawite hi Joint Parliamentary Committee-in a chhuichian an phut tih MPCC hruaitu hian sawiin, BJP sawrkarin eptu party-te rorelna hnuaiah leh J&K ah thamna inpekna contract a awm tih hi pawm siin, Adani hian official-te a tham a ni tih a pawm thu a sawi lang leh duh si lo tih a sawi a. Danin a then a huam laia a then a huam lo chu ram tan a tha lo hle tih a sawi.
ongress-in Adani-te thamna pek dan Parliamentary Committee chhui phut
