ei man/ chhiah pek chu online-a tih theih turin department-in a buaipui mek tih Land Revenue & Settlement minister Lalruatkima chuan a sawi a. An department hnuaia surveyor-te chu ram tehnaah ram neituten sum pe tawh lo turin a ngen. LR&S minister hian an department hnuaia thawk serveyor-te chu mimal ram teha an kalin ram neituten sum an pe thin tih a sawi a. Hlawh neia thawk an nih avangin ram neitute chu sum pe tawh lo turin a ngen. Mimal emaw pawl emaw in ram an dilin surveyor indaih lohna a nasat avangin an ram teh turin rei tak an nghah a ngai thin tih sawiin, mipui harsatna sutkianna atan survey firm rawih theihna – survey firm empanelment buaipui mek a ni tih a sawi.
Assam Rifles luah Lammual chhehvelah ram nei mimalten an LSC-te sawrkar leh mipui tan tiin an pe kir tih a sawi a. Ram nei anga insawi, an ram ngei a ni tih finfiahna nei lo mi pariat chu hun tiam chhunga an ram a ni tih fiahna tilang chiang tura an ngen bakah LSC nei mi pathumten court a an kalpui thu a sawi a. Hun reilote chhunga an chinfel thuai a beisei tih a sawi a ni.
Land Revenue & Settlement department hnuaia an hmalakna a sawi a. Sawrkarna an chan chhungin house pass 4504 pe in, sumdawnna atan house pass 19 an pe tih a sawi a. Periodic pata 853 pe in, hun bik nei atan department leh kohhran bakah pawl hrang hrang hnenah land lease 935 an pe tih a sawi bawk.
Kum 2018 atanga 2024 chhung atan LR&S hnuaiah chhiah chi hrang hrang atangin Rs. 1,03,75,21,788.00 a lut tih a sawi a. Online-a tax pek theih dan an ngaihtuah mek tih sawiin, khawn leh hmasak bera hman nghal theih tura beisei a nih thu a sawi.
Revenue minister sawi:
# Khuarel chhiatna avanga in leh lo chante chu Ramhlun Sports Complex hmuna an inbelbelna tur ram ruahman sak niin, mi engemawzatin in sa in an cheng tawh a. LSC erawh pek an la ni lo a, tunah hian buaipui mek a ni tih Revenue minister hian a sawi.
# Land records felfai lehzuala neih theihna turin computerization of land records kalpui mek a ni a. North Eastern Council atangin fund, cheng vaibelchhe 6.4 hmuh a ni. Land records neihfel hunah chuan ram in neihthuah a veng viau tura ngaih a ni a, ram inthuah a tam chhan chu, tunhmaa modern survey hmanga teh thin vang a ni.
# Ram neituten an ramri an chiang lo thin a. Ram teh a nih reng rengin boundary pillar leh geo-coordinates lak vek a nih tawh dawn bakah GIS ah update vek zel a nih avangin an ramri chin a chiang tawh hle dawn a, hei hian land dispute awm thei chu thui tak a veng tura beisei a ni.
# Bawngkawn Brigade ram phase-I chu restrict reng thin chu sawrkarin a hlip tawh a, helai hmuna chengte hnenah hian pass pek turin hma lak mek a ni.
# SVAMITVA scheme hnuaiah kum 2020 atangin thingtlang khuate Property Card pek a ni a. Phulpui leh Tachhipah 420 pek a ni tawh. Mizoram chu NE state zinga Property Card pechhuak thei hmasa ber niin, khaw 319 pek tura ruahman a ni a, tunah khaw 215 ah drone flying hmanga survey tawh niin, drone hmanga survey hnu hian ground ah survey leh thin a ni a, khaw 78 survey a ni tawh. Property Card hi a thlawna pek niin, card neite hian an ram dahkhamin, bank loan emaw financial assistance awm theite an la/ dawng ve thei dawn a ni.