Awlsam zawka stamp duty pek a nih theih nan e-stamp a lei theihna siam a ni dawn a, tihfel ngai tlem tihfel hunah a taka hman tan tum a ni.
Land Revenue & Settlement B Lalchhanzova sawi danin, awlsam zawka mipuiin stamp duty an pek theih nan e-Stamping Rules peihfel a ni tawh a. 2024 July 2 khan sawrkar gazette-ah tih chhuah a ni tawh. Logistics tihfel ngai tlem la awm tihfel a nih hnuah mipuiin physical stamp lei ngai tawh loin online in e-stamp an lei thei tawh dawn a. Hei hian stamp paper indaih lo leh a lei tura tlankual ngai chu a tibo tawh dawn a ni.
Ram lei leh hralh, dahkham leh thil dang dangah registration fee chu State Bank of India Main Branch-a pek ngai kher thin chuan mipui senso a ti tam a, hun a heh bawk avangin, registration fee hi district tina settlement office-a pek theih turin ruahman a ni a. Aizawl SO office-ah chuan July 22 atang khan hman tan niin, district dangah pawh hman a nih thuai theih nan settlement officer-ten hma an la mek tih a sawi bawk.
Mizoram Land Revenue Act 2013, section 6(1) tlawh chhanin revenue officer hrang hrang (SDO Civil telin) chu 2024 May 1-a notification hmangin Revenue Court-a puan an ni a. Revenue commissioner atanga Sub Division thlenga anmahni zawna thuneihna semzai niin, heng court hian anmahni bial theuhah thubuai an ngaihtuah thin dawn tih minister hian a sawi.
Hei hi ruahman thar ni loin, thil awmsa reng, department lamin a lo hman tangkai vak loh thil a ni tih LR&S department hotute chuan an sawi.
Rambuai harsa bik, officer pakhat tana chinfel mai harsa awmah chuan, khawi lai veng emaw house site plan emaw ah complaint tam tham tak a luh chang a awm thin tih sawiin, department chuan heng chinfel nan Fact Finding Committee din thin a rel a. An ni hian complaint lut leh tul dangte uluk taka zirchiangin, sawrkarah an zirchianna chu hun tiam chhungin an thehlut thin dawn tih an sawi a ni.
Online-in stamp lei theih dawn
