OpenAI staff te chuan artificial intelligence company board te chu an hotu hlui Sam Altman an ban thut avanga bang vek turin an phut.
Lehkhathawn an ziahah board chu thil ngaihtuah thuk lo tia sawiin leh firm hnathawk te ngainepah an puh bawk a.
Chumai bakah Altman chu lakluh leha a hna ngai chelhtir leh an ngiat bawk.
Mahse Altman chu Microsoft in lalut nghal varin, Altman leh Microsoft boss Satya Nadella te chuan OpenAI hlawhtlinna chu an ngai pawimawh an ti bawk a.
“Satya nen OpenAI tihlen chhunzawm zel kan ngai pawimawh ber a ni” tiin Altman chuan a tweet zui a.
“Kan thawhpui leh customer te hnenah operation pek chhunzawm zel kan tum a. OpenAI/Microsoft thawdunna hmangin a tihtheih a ni” tiin a sawi bawk.
Altman hi karkalta Zirtawp khan ban a ni a, artificial intelligence khawvela hmel langsar ber pawl a nih avangin mi maktih a hlawh hle a ni.
A thawhna OpenAI ah chuan senior staff te pawh telin signatory za chuang te chuan Altman dahlet leh an ngiat chu tihhlawhtlin a nih loh chuan banah an vau bawk a.
Chumai bakah OpenAI a investor lian ber Microsoft te chuan OpenAI staff te chu an hnenah hna a awm thu an hrilh tiina n sawi bawk.
CNBC tena an interview naah nadella pawhin OpenAI emaw OpenAI hnathawk te Microsoft pan thlang te nena hnathawhhho an duh dawn tiin a awi bawk a.
“Tun dinhmunah OpenAI inrelbawlnaah thil thleng inthlak danglam a awm mek a ni” tia sawiin sawihona an neih tur thu a sawi zui bawk.
OpenAI a engagement manager Evan Morikawa chuan OpenAi hnathawk 770 zinga 743 te chuan lehhkhathawn ziahah an hming an ziah hnan tiin a sawi a.
Hming ziah hnatu zinga langsar ber chu OpenAI chief scientists Ilya Sutskever niin, Altman bantu board member a ni chungin Altman lakluh leh a nih theih nana hming ziah hnantu zingah a tel thung.
Bantu zinga a tel chu pawi a tih thu sawiin, “Board thutlukna siama ka tel ve kha ka inchhir takzet a ni. OpenAI tihchhiat ka tum ngai lo. Kan thil siam ho tawh te hi ka duh em em vek a, company inlungrual leh nan ka theihtawp ka chhuah ang” tiin a sawi zui bawk.
Buai nuai nuai
Thil thleng rang tak bawk si karah Altman chuan Microsoft ah hna a hmu nghal a, Microsoft te hi OpenAI a investor lian ber niin 49% stake an nei a.
Microsoft chief executive Satya Nadella chuan Altman chuan ‘new advanced AI research team’ a enkawl nghal ang a ti zui bawk a.
Kum 38 chauha upa Altman hi ChatGPT bot siamtu ber niin generative artificial intelligence (AI) lamah amah aia langsar an awm lo.
Altman bantu board member te chu bang vek tura nawrna a nasa hle a. Chutihlai chuan ex-Twitch CEO Emmett Shear chu OpenaAI interim boss atan lakluh a ni thung.
Dan Ives of investment firm Wedbush Securities chuan Microsoft chu an inthuamthat belh nasa chiang hel a, mahse, thil thleng mek chu OpenAI tan a pawi takzet thung a ti thung.