Mizoramah politics harhtharna a thleng mek a, tapchhak titi leh opinion poll zawng zawngah pakhatna an hauh vek niin ZPM leader Lalduhoma chuan a sawi.
Ningania Champhai North Block I leh II ZPM Block Conference a hmanpuinaah Lalduhoma chuan, Mizoramah party pahnihin ro an inrel chhawk a, rorel lai party leh chief minister an inthlak a ni mai a, engmah a danglam chuang lo tih an hmuh avangin a kalphung thlak thleng turin kalphung thar sawrkar an aupui tih a sawi. Party sawrkar hlir Mizoramin a hrawn avangin society leh kohhran thlarau nun thlengin a ei chhe tawh niin a sawi bawk.
Mizoram rorelnaa Pathian ram thlentir chu ZPM tum ber leh an ngaihpawimawh ber a ni tihu a sawi a. Mizoramah politics harhtharna a thleng mek a, inthlan hnuhnungah chakna an chang deuh vek a, tapchhak titi leh opinion poll zawng zawngah pakhatna an hauh vek tih ZPM leader hian a sawi. “Heti taka Pathianin ZPM a chawisan chhan hi a ram din tura min duh vang a ni,” a ti.
Rorel laite chu inthlan dawn apiangin kawngpui tlo lo taka siam a, a hnulama an tih theih loh tur tiam leh an enkawl zui theih loh tur tam tak hawngah puhin, rorel lai party-in inthlan dawn hnaiah thil sem vak a, flag an tar chiam chuan an tla dawn tihna a ni tih a sawi a ni.
Opinion poll-ah pakhatna kan hauh vek – ZPM leader
