Opium thar tam Myanmar
Myanmar chuan khawvela opium thar tam ber ni thin Afghanistan lehpelin khawvela opium thar chhuak hnem ber ram a ni ta niin UN-in report a siamah tar lan a ni.
Ruihhlo hlauhawm tak, heroin siamna bulpui ber pakhat hi kum hmasa aiin 36% zeta thar tam zawkin tonne 1,080 a thar chhuak. Myanmar-a heti taka opium thar a pun chhan hi a ram dinhmun tha lo tak avang leh Taliban sorkar hnua Afghanistan-a ruihhlo a khap tak vang nia ngaih a ni a. Khapna avang hian Afghanistan-a poppy chin chu 95% vel zetin a tlahniam nghal bawk.
United Nations Office for Drugs & Crime (UNODC)-in report a tihchhuahah chuan kum 2021 kum tira sipaiten thuneihna an chan leh hnuah Myanmar-ah tual chhung buaina leh indona a chhuak nasa a, hei hian an eibar dinhmun pawh a chhe zawngin a nghawng hle tih an tar lang a, “Dan ang taka eibar dap a harsa a, inzawrh leh sorkar belh a buaithlak a, thil man sang leh pawisa hlutna tlahniam chuan opium lamah mi a hruai ta a. Opium bakah hian khawsakna atana an mamawh si avangin dan phal loh thil tih a tihluar bawk,” an ti. “Hetiang hi an dinhmun a nih miau avangin kum 2022 tawp lam atang khan lo neitute pawhin opium chin lam an hawi ta a ni,” an ti bawk.
Opium hi a hring leh ro seng hun laia a man pawh kg-ah $317 atangin $356-ah a chho a, Myanmar-a opium an chinna hmun hi ram hactare 47,000 vela zau ni tura chhut a ni a, sipai sorkar din leh hma aiin 18% laiin a zau zawk.
Myanmar awmna lai, Thailand leh Laos ramte nena an inrina lai bawr hi ‘Golden Triangle’ tia sawi thin a ni a, tun hma atangin opium leh heroin thar chhuahna hmunpui ber a ni. Myanmar leh Afghanistan ram pahnihte hi khawvel puma heroin hralh chhuah tam ber tumtu an ni bawk.
Opium thar tam Myanmar
