Janata Dal (U) member tena party patriarch leh Bihar Chief Minister Nitish Kumar an Opposition pary leaders inhmuhkhawm a koh theiha Patna a June 23 a inhmuhkhawm a siam theih chu nasa taka an fak laiin a phena che erawh a awm
Patna-a inhmuhkhawm huaihawt a nih theih nana sulsutu zawk chu Rashtriya Janata Dal (RJD) chief Lalu Prasad fapa leh Bihar Deputy Chief Minister ni bawk Tejashwi Yadav niin a phena mi tangkai ber a ni.
RJD chief hi Bihar Chief Minister leh Congress leader Rahul Gandhi leh West Bengal Chief Minister Mamata Banerjee te June 23 event a tel tura hmintu tiin an sawi a.
A hma pawhin Bhihar Deputy Chief Minister hi Kumar-an ram pum huapa zin veivah neia Opposition heavyweights Aam Aadmi Party (AAP) chief leh Delhi Chief Minister Arvind Kejriwal te bakah Jharkhand Mukti Morcha president leh Jharkhand CM Hemant Soren te Patna inhmuhkhawma tel thei tura hmintu an ti.
Yadav hian aircraft charter duh ngatin Dravida Munnetra Kazhagam (DMK) president leh Tamil Nadu Chief Minister M.K. Stalin birthday lawmnaa March 1 a tel turin a kal duh a, Stalin hian June 23 meeting-ah tel a tum thu a puang zui nghal bawk.
Thla hmasa pawh khan Yadav hian Kozhikode tlawhin regional hrang hrang Kerala Chief Minister leh Communist Party of India (Marxist) Polit Bureau member Pinarayi Vijayan te nen pawh dawhkan khat an kilho tawh bawk a.
“Opposition meeting-ah hian thutlukna liantham tak kan siam theih ngeih kan beisei a, tichuan kan hruaitu ten State te chiang zawkin an kaihruai thei dawn a ni,” tiin senior RJD leader chuan a sawi.
June 23 meeting-a tel tur Opposition leader tichiang tawh zingah Congress president Mallikarjun Kharge, senior Congress leader Rahul Gandhi, Samajwadi Party chief Akhilesh Yadav, former Maharashtra CM Uddhav Thackeray, NCP chief Sharad Pawar, National Conference leader Farooq Abdullah leh PDP leader Mehbooba Mufti te pawh an tel a ni.
Opposition party rual te hian kum 2024 Lok Sabha inthlanah BJP te hneh tura thawhho an tum nia ngaih a ni a. Tun hnaia party leader hrang hrangte thusawiah BJP te chu party mal theuha beih chuan hneh ngaihna awm lovah ngaiin hei vang hian thawhho mai ni se an ti nia sawi a ni.
Opposition inhmuhkhawm hi a tira neih tum hmasak chu Congress hruaitu lawkte thil pawimawh dang an neih avanga an tel theih dawn loh avangin thulhin a lo awm tawh a. Congress leader ten an tel lo pawhin kalpui tho ni se, an thlawp chian sa tur thu an sawi chung pawhin Congress party hruaitu lawkte hman hun nghah leh rih phawt a ni.
Ruahmanna kimchang siam a la ni lo chungin BJP hneh theihna tur nia ngaih hmun thenkhatah chuan Opposition te chuan a hranpa zela ding lova BJP hneh thei tura ngaih chu thlawp mai an tum dawn nia sawi a ni bawk a. A hma pawhin West Bengal Chief Minister Mamata Banerjee chuan Bengal-ah Congress tena BJP te hneh an nih theih nana Trinamool Congress an thlawp thei a nih chuan hmun dang dangah pawh Congress te thlawp chu an hreh dawn lo tiin a lo sawi tawh a ni.
Nitish Kumar Cabinet bang
Hetih lai hian Bihar Minister Santosh Kumar Suman chuan Chief Minister Nitish Kumar kaihhruai cabinet chu bansanin a bansan chhan a sawiah Janata Dal(U) chu party dang nena inzawm an tum a ti a. “Kan party dinhmun a derthawng a, ka ban chhan hi humhim ka duh vang a ni,” tiin a sawi.
“Sawm pawh kan nih loh a, recognised party pawh kan nih loh chuan engtiangin nge sawm kan nih ang?” tiin a party Hindustani Awam Morcha (HAM) tena June 23-a Opposition party meeting a tel ve an tum chungchang a sawi a.
“Ramngawah thil nung hrang hrang an cheng a. Sakeibaknei te, ransa lian leh te pela awm te, an vaiin an tlanchhuak thei vek a, sazuk tak ngial pawh a him a ni. Keini pawhin kan pumpelh char char thei a, mahse vawiin hian kan him reng dawnin ka hre lova ka chhuahsan a ni,” tiin sawifiah tawh chuang lovin a sawi.
Suman chuan an party chuan BJP kaihhruai NDA sorkar biak pawh tumna an neih loh thu leh ruling alliance-ah chuan an la beh dawn tho thu a sawi bawk a. “Independent party kan ni a, kan him theih dan tur kan ngaihtuah ang a. Tunah erawh ka ngaih tuah lo va, Mahagathbandhan a la tel zel erawh kan duh,” tiin HAM leader chuan a sawi bawk.
Suman hi Bihar Chief Minister hlui Jitan Ram Manjhi fapa niin State sorkar a SC/ST Welfare Department Minister a ni a. An party chu ruling JD(U) leh Tejashwi Yadav kaihhruai Rashtriya Janata Dal (RJD) thawhpui a ni a. HAM chu ruling alliance-ah a la tel zel ang, tiin Santosh Kumar Suman chuan a sawi bawk.