Opposition ten UPSC vangin sorkar khak

Union Public Service Commission (UPSC) chairperson Manoj Soni kum 2029-a a hun tawp chauh tur ni siin banna a thehluh avangin Opposition te chuan eng vanga sorkar chu he mi chungchang ngawihpui reng nge an nih tiin zawhna an siam a. Soni chu sorkar chuan an nawrchhuak tiin an sawi bawk.
Thla khat kalta tawhah khan UPSC chairperson chuan mimal harsatna chhuanlamin banna a lo thehlut tawh a. Tun hnaia IAS officer Puja Khedwar identity paper dik lo leh diability certificate hmanga puha UPSC in July 19 a criminal case a ziahluh hnuah UPSC chairperson banna thehluh chu mipui hriatah sawichhuah ni chauha ngaih a ni.
Congress president Mallikarjun Kharge chuan BJP leh RSS te chuan systematically-in India constitutional body te thunun vek an tum a, chu chuan insitution te hmingthatna te, integrity leh autonomy te a tichhia a ni tiin a sawi.
“UPSC Na scandal tam tak awm hi ram tana ngaihmawhawm a ni. PM Modi leh a Minister of Personnel, Public Grievances and Pensions te hi an felfai a ngai a ni. A tling lo zawk tena a lema thil an tih leh medical certificate lem hmang te a system an bum thei hi a dik lo” tiin Kharge chuan a sawi a.
Zirlai tam tak te zan khawtairek thleng thlenga theihtawpa inpuahchaha civil services examination hmachhawn te namnulna a ni, a ti bawk a.
“UPSC Chairperson meuh kum nga service a la neih laia a bang thut te hi a ngaihmawhawm a ni. Eng vangin nge thla khat chuang a banna phochhuaha a awm loh? Scnadal tam tak leh a banna hian inzawmna a nei em?” tia sawiin Kharge chuan UPSC Chairperson bang ta chu Prime Minister Narendra Modi duhsak uchuak tak Gujarat atanga UPS Chairman ni tura a lakthlak ngat a ni a ti bawk.
Samajwadi Party (SP) president Akhilesh Yadav pawhin UPSC Chairperson banna chu solution a ni lo tia sawiin Commission a corruption kalpuitute chu hrem an ni ngei tur a ni a ti bawk a. SP leader chuan Bharatiya Janata Party (BJP) te hian ‘steel frame of India’ tia sawi lar civil service chu an tichhia a ni a ti bawk a.
“UPSC hnuaia IAS officer recruitment scam thlen hnua ban hi chhanna a ni lo. He thila mawhphurhtute chu chhuichhuaha hremn pek ngei tur a ni. BJP te hian ‘Steel frame of India’ hi tuiekin an siam a ni,” tiin Akhilesh Yadav chuan a sawi bawk.
Congress general secretary Priyanka Gandhi Vadra pawhin he ram mipui vaibelchhe tel te rinna leh ni tin sorkar inrelbawl dan chu UPSC professional system a innghat tlat a ni a ti bawk a. “Heng mite hi UPSC top post ah hian political appointment kaltlanga lut an ni em ni? Chutiang a nih chuan an lakah eng hunah nge hremna lekkawh a nih dawn? Sorkar atangin chhanna leh sawifiahna awm ngei rawh se” tiin a sawi bawk.
Congress general secretary, in-charge of communications, Jairam Ramesh chuan, “Modi ngeiin Gujarat atangin a favourite ‘academics’ chu kum 2017 khan UPSC member ni turin a chawlut a, kum 2023 khan kum ruk chhung atan chairman-ah a dah zui a ni. Mahse, he distinguised gentleman hian kum nga hun a la nei chungin banna a thehlut ta si a. Eng vang pawh ni se, tuna UPSC in buaina a tawh karah hian nawrchhuahin a awm tihna a ni” tiin Ramesh chuan a sawi bawk.
Trinamool Congress’ Rajya Sabha member Jawhar Sircar pawhin, “National institution in harsatna a tawk leh ta. Kum sawm tam UPSC in Sivil Servants tur a thlang thin a, retired Civil Servants & Experts tena an kaihhruai thin a ni a. Modi chuan religious academic a ruat a, tunah a bang leh a, system a crash hnuah bangin Gujarat ah sakhuana thila inhnamhnawih leh turin a kal leh ta,” tiin a sawi.