Thuneitute sawi danin nimin Nilaini kan Bengaluru khawpui kawng lun lai Tavarekere an tih hmuna Koramangala huam chhung building chhawng li-na cafe hmun atangin kangmei nasa tak a chhuah thu dawn a ni.
He kangmei hi Nilaini chawhma dar 11:30 vela chhuak niin he building chhawng li-naa Mudpipe Cafe atanga chhuak nia report niin a chhawng hnuai chiah Cult Fitness Gym-ah a kangkai zui ta nia sawi a ni.
Kangthelh motor palite chu rang takin a hmun an thlengin tuiin an phuh nghal char char a, mipuite chu hmun him zawka thiar chhuah nghal zung zung an nih thu thuneitu te chuan an sawi a ni.
Kangmei a chhuah tantirh vel lai hian nasa taka inthiarfihlim tumin an insingsa nghal a, he building hnuai lama bike 2 ding lai leh car zawrhna showroom-a car pakhat te chu a kang chhe hman tih thuneitu te chuan an sawi a ni.
He kangmei chhuah lai mita hmutute sawi danin kangmei chhuahna building chhawng lina atang hian kangmei pumpelh tumin mi pakhat chu a zuang thla lai an hmuh thu leh kangmei lo thlirtu ten damdawi in lam an panpui nghal thu an sawi bawk a ni.
Kangmei mita hmutu Rajkumar chuan, “Thil puak ri ring tak ka hriat velah ka thlir nghal a, mi reng reng mai chu phili takin an tlan kual nuaih nuaih a, video te in thla an la chur chur bawk a,” tiin a thil hmuh dan a sawi a ni. Thil chiang zawka hretu te chuan kangmei chhuah lai hian mi tamtak kangmei chhuahna building chhungah an awm loh thu an sawi a ni.
oramangala, Bengaluru-ah kangmei chhuak
