Mizoram sawrkarin Tourism director atana R Lalrodingi a ruatna a sut hnu ah a ruatna order chhuak nawn leh chu duh loin vawiin – May 25 hian MZP chuan Tourim department thawktute pisa kai tur dan an tum.
MZP Gen. Hqrs. hian Tourism director atanga kalchhuak ta R Lalrodingi sawrkarin a rawih nawnna a tihchhuah khan an duh loh thu sawiin, chief minister an lo sawipui tawh a. Hemi hnu hian sawrkar chuan director atana ruatna bik hi sutin, ‘officer on special duty to chief minister’ a a ruatna erawh a la keng tlang a ni.
Kar kalta khan sawrkar chuan order a lo tihchhuah tawh, Tourism director atana R Lalrodingi a sutna luahlanin, Tourism director charge la tura ruatna hi a tichhuak thar leh a ni.
Inrinni khan MZP Gen. Hqrs. hian thutkhawm hmanhmawh koin hemi chungchang hi an ngaihtuah a. Mizoram sawrkar thuchhuah chu mipui leh zirlaite zahlohnaa a ngai, tiin, he thuchhuah hi sut leh a nih hma chuan na takin an dodal dawn tih an sawi a ni. Hmalakna hmasa atan vawiin – Thawhtannia Tourism department thawktute pisa kai tur chu dan an rel a ni.
MZP president C Lalremruata chuan zawhna chhangin, Pi R Lalrodingi chungchangah hian May 13 khan chief minister chu a pisaah an hmu a. OSD to CM chu political appointment a ni a, an sawi theih a ni loa; Tourism director atana ruat nawn a ni erawh an duh loh thu chiang takin an thlen a. CM hian ennawn a ni dawn tih ziakin a tiam a, an huntiam – May 14 hnu ah pawh CM intiamna avangin sawrkar hmalakna an ngaichang zui rih ta tih a sawi. Hetihlaia OSD to CM atan chauha pi R Lalrodingi ruat a nihna a chhuah hnu ah Tourism director atana ruatna a chhuak leh chu, Mizoram sawrkar leh chief minister-in a office-ah ngei dawt a hrilh ni ah an ngai a; mi pakhat induhsak bikna a awm chu pawi an ti a, tun hnu ah thleng tawh lo se an duh tih a sawi a ni.
MZP hmalak tum dan hi Joint Hnampual Zirlai Pawl leh Mizoram Hindi Zirlai Pawl chuan an thlawp tlat tur thu thuchhuah an siam a ni.
Order sut ngiatin MZP-in Tourism thawktute pisa kai tur dan an tum
