Organic thlai leh Mizoram

Mizoram Larsap chuan nimin khan Raj Bhavan-ah agriculture leh horticulture department hotute kawmin ‘sustainable agriculture’ (hmalakna tlo leh tluantling, thing leh mau tichereu lo leh leilung tichhe lo thei ang bera eizawnna kalpui) chungchang a sawipui a. Ngaih pawimawh deuh a nei a, chu chu ‘Organic Thlai’ a ni. Fertilizer tel lo thlai thar chhuah kawngah tanlak nasat a tul thu sawiin, organic thlai a ni ngei tih finfiahna hmun, laboratory leh standard tha state puala neih tul a ti.
Ram changkang apiangin organic thlai an ngaihlu a, an ngaihhlut chhan pawh, chemical/fertilizer tel lo, a hrisel bik vang a ni.
Mizoramah hian thlai chingtu tam takin hlawk zawka thlai tharchhuah an duh avangin fertilizer an hmang a. Ferlilizer hmanga chawm seilen thlaite hi an hmelhmang mawi viau mah se, a hâng lo bik a, a khawng fûr a, a thente chu damdawi rim te pawh nam chhuak hial nia sawi thei te pawh an la awm lehzel a. Bazara thlai zuartu tam tak hian an thlai zawrh hi ‘fertilizer tel lo’ an ti deuh kher thin a; chu chuan fertilizer hmanga thlai chawm a tamzia a pholang nghal a. Ferlilizer tel lo tak tak a nih leh nih loh mipui lamin kan zuk hre si se tawh si lo hi a buaithlak hle a ni.
Kan hetih vang hian a ni ange, Larsap pawhin ‘fertilizer tel lo thlai thar chhuah kawngah tanlak nasat a tul’ tia a sawi hial reng ni. Chu mai pawh chu la duhtawk lovin, state puala organic thlai finfiahna laboratory neih tul a la ti lehzel a ni.
Tunhma khan sawrkar chuan Organic State nih tumin hma a lo la ve tawh ngei mai a, Organic market te pawh a awm hman hial a; mahse, organic fir (pure organic) a nih chiah leh chiah loh enfiahna tur laboratory kan nei lo. Thlai chingtute leh agri/horti lam thawhhona hmanga ‘organic’ kha a ni deuh tawp mai.
Kan thlai thar chhuah atanga sum lakluhna hlawk ber tur chu, tharchhuah tam vak aiin ‘quality tha’ hi a ni a, chu chu ‘Organic Thlai’ hi a ni. Thar chhuah tam avanga hralh tam a ni lo, hei sawhthing atang pawhin a lang reng a nih hi. India ram state dangte hi keini aia thlai tharchhuak tam vek an ni. Keini chuan Organic Thlai hi thar chhuah tam tum ta zawk ila, kan thlaite a ‘Organic’ miau chuan, ram changkang leh hausa, pawisaa buai ve lote duhzawng a nih dawn avangin ‘hralh theih loh’ tih hi a awm vak lovang.
Hetianga hma kan lak theih phawt chuan, sum chang thlai chin lamah kan insawrbing thei ang a, kan environment tichhetu shifting cultivation hi kan thlauhthla chho zel ang a, chu chu sustainable agriculture a ni nghal ang a. Mizoram Organic thlai thar phur tur hian Cargo Plane hi Lengpui airport-ah an rawn tum zut zut tawh mai dawn a ni. Ram zimtea cheng mihring tlemte hian quantity aiin quality hi tinzawn thiam ila, chu chu kan thatpui berin a rinawm.