Osaka dan zawh loh Swiatek

Osaka dan zawh loh Swiatek
Defending champion Iga Swiatek chuan a zawna FRench Open title vawithum lak tlin a tumna kawngah Nilaini khan 7-6 (7-1) 1-6 7-5-a Naomi Osaka hnehin Paris-ah second round a paltlang leh ta phawt.
Kum 22-a upa Pole hian awlsam tak chuan world number one hlui Osaka hi a paltlang bik lo a, score-a kan hmuh ang hian harsa fahrana set khatna a lak hram hnuah awlsam zetin set hnihna a hloh a, set thumnaah rim taka thawk chungin a vannei zawk dinhmun a luah a, tunhma lama clay leilunga talbuai thin Japanese a hneh danah han inchhuan viauna tur nei a intih loh rualin a beisei ang ngeia khirhkhan a nih thu a sawi.
Osaka kha fanu Shai a hrin hnua chawl vang vang, thlalia liamta maia khelmuala kirleh hlimhlawt a ni a, a thiamberna leilung a nih bawk si loh avangin champion lai kha awlsam taka tlang mai tura ngaih a nih laiin top seed Swiatek lakah kum 26 mi Japanese a tal thei phian a, Court Philippe Chatrier chungkhuh hnuaiah an inbei zek tlat!
Swiatek hi Serena Williams hnu lama WTA Tour thunun hneh ber a rawn ni chho kal mek a, a bik takin clay leilunga a record hi a chhuanawm zual.
Osaka laka tlawm a pumpelh leh chiah khan Roland Grarros-a a match khelh hnuhnung 32-ah tum hnih chiah a tlawm a; major title pali a lak tawh zawng zawngte kha hard court atanga a sualchhuahte vek an ni bawk.
Tun season-ah hian clay bikah vawikhat chiah chak loh a la nei a, Paris a pan hmain French Open inbuatsaihna lian pahnih Madrid leh Rome-ah a champion a; tunhma lama French Open fourth round thlen hmaa la tlawm ngai lo a nihna nen kumin pawh hian a title kawl lai humhim leh thei tura ngaih ngheh a ni a, a champion leh thei a nih ngai chuan Monica Seles (1990-92) leh Justine Henin (2005-07) hnu lama Open era china French Open title vawithum la zawn thei hmeichhe player hmasaber a ni ang.
Nilaini inkhel dangah Grand Slam final vawithum (Wimbledon 2022 & 2023, US Open 2022) khel tawha la tlawm fai vek eighth seed Ons Jabeur chuan set hnihna hloh chungin Colombian Camila Osorio laka 6-3 1-6 6-3 hnehna nen third round a lut.
Kum 29 mi Tunisian hi nikum khan Roland Garros-ah hian quarter-final a thleng a, kuminah pawh thleng sang tur zinga rinluh a ni a, mahse, Osorio lakah chiang fahranin set laihawl a hloh a, a grand slam title hmasaber tur a beisei leh mekna kawngah nikuma a thlen chin a pha lo mai ang a tih ngaihdan a piang hman thuak dawn a, mahse, set thumnaah insiamthain, third round lamah Canadian 31st seed Leylah Fernandez leh Chinese Wang Xiyu inkhela chak zawk zawk lakah fiahna dang a hmachhawn leh thei dawn a ni.
American third seed Coco Gauff pawh Slovenia player Tamara Zidansek lakah 6-3 6-4-in a chak a, kum 2022 anga Roland Garros final thlen leh a beiseina kal zelah Ukraine mi Dayana Yastremska leh Chinese Wang Yafan inkhela tlang zawk zawk a su zui leh dawn a ni.